Վերմոնտի համալսարանի ամերիկացի գիտնականները պնդում են, որ դեռահասների ագրեսիվությունը կարող է անմիջականորեն կապված լինել նրանց խմած գազավորված ըմպելիքների քանակի հետ: Ինչպես գրում է բրիտանական Daily Telegraph պարբերականը, հետազոտվել են Բոստոնի շուրջ 20 դպրոցներում սովորող աշակերտները, հարցախույզին մասնակցել են 14-18 տարեկան ավելի քան 1,8 հազար դպրոցականներ:
Գիտնականներին հետաքրքրել է` որքան շատ քաղցրացված հյութեր են վերջիններս օգտագործել մեկ շաբաթվա ընթացքում մինչ հարցմանը մասնակցելը:
Բացի այդ` հարցախույզի մասնակիցներին հարցրել են` արդյո՞ք նրանք ագրեսիա են դրսևորել իրենց հասակակիցների հանդեպ վերջին մեկ տարվա ընթացքում կամ կրե՞լ են արդյոք սառը զենք:
Հետազոտության արդյունքների համաձայն` ավելի քան 14 շիշ գազավորված ըմպելիք օգտագործած դեռահասները հայտնել են, որ կրկնակի ավելի շատ զենք են կրել, քան նրանք, ովքեր նախընտրել են խմել ընդամենը 2 շիշ հյութ:
Գիտնականների եզրակացության համաձայն` ալկոկոլի և ծխախոտի օգտագործման ու գազավաորված ըմպելիքների նկատմամբ սեր տածողների մեջ ագրեսիայի առաջացման հավանականությունը բարձր է 9-15 տոկոսով:
Հեղինակները չեն բացառում, որ ուղիղ կապ կա գազավորված ըմպելիքների օգտագործման ու դպրոցականների ագրեսիվության միջև: Նրանց կարծիքով` դա պայմանավորված է գազավորված ըմպելիքներում պարունակվող կոֆեինի և շաքարի բարձր պարունակությամբ:
