Բրիտանական Post Office ընկերությունը հետազոտություն է իրականացրել և պարզել, թե եվրոպական որ լեռնադահուկային հանգստավայրն է ամենից մատչելին զբոսաշրջիկների համար:
Հետազոտության հեղինակները հաշվարկել են բարձունքը հաղթահարելու համար նախատեսված ճոպանուղու արժեքը, դահուկային համազգեստի վարձույթի համար սահմանված գումարի չափը, սննդի և ըմպելիքների գները:
Եվրոպայի ամենաէժան լեռնադահուկային հանգստավայր է ճանաչվել բուլղարական Բանսկոն: Զբոսաշրջիկին այնտեղ մնալու համար ընդհանուր առմամբ հարկավոր է 302 եվրո:
Այսպես, Բանսկոն առաջ է անցել անգամ Անդորրայի Արինսալ հանգստավայրից, որն անցած տարի ճանաչվել էր ամենաէժանը:
Բրիտանական ընկերության տվյալով` այս տարի Անդորրայում հանգստանալու համար անձը պետք է վճարի 422 եվրո, ինչը երկիրը դարձնում է «սահելու» համար ամենաէժան վայրը եվրոպական այլ երկրիների շարքում:
Անցած տարվա համեմատ Բուլղարիայի և Անդորրայի հանգստավայրերում մնալն էժանացել է 5 տոկոսով:
Թանկացել են Շվեյցարիայի լեռնադահուկային հանգստավայրերի գները:
Փորձագետները նկատում են, որ գների աճը Շվեյցարիայում բացատրվում է տարադրամի տարբերությամբ: Անցած տարվա համեմատ շվեյցարական ֆրանկը եվրոյի համեմատ ամրապնդել է դիրքերը:
Ամենամատչելի հանգստավայրը տրանսպարտի տեսակետից, ըստ բրիտանական ընկերության, սլովենական Բոխին լեռնադահուկային հանգստավայրն է:
Նրան հաջորդում են իսպանական Ֆորմիգալը, իտալական Լիվինյոն և ավստրիական Շլադմինգը:
