«Հոկտեմբերի 25-ին թուրքիայի պաշտպանության նախարարությունը պաշտոնապես հայտարարել է, որ ավելի վաղ տարածված տեղեկությունն այն մասին, թե Թուրքիան Իրաքի հյուսիսային շրջաններ տանկեր կմտցնի, չի համապատասխանում իրականությանը»,– հայտնում է France-Presse գործակալությունը:
Նախարարության ներկայացուցչի խոսքերով` տանկերը գտնվում են միայն թուրքական կողմի սահմանում, որտեղ վերջին ժամանակներս անցկացվում են զորավարժություններ:
Թուրքական տանկերի ներխուժման լուրը հերքել են նաև Իրաքում: Իրաքյան սահմանապահ զորքերի հրամանատար, գնդապետ Հուսեյն Թամերը հայտարարել է, որ թուրք զինվորականները Իրաքի տարածքում չեն գտնվում:
Քրդստանի աշխատավորական կուսակցության ներկայացուցիչ Ահմեդ Դենիսը իր հերթին հայտարարել է, որ նա նույնպես տեղեկություն չունի թուրքական տանկերի կամ այլ զինվորական ստորաբաժանումների մասին, որոնք գտնվում են Իրաքի հյուսիսում:
Հոկտմեբրի 24-ին Reuters գործակալությունը, հղում կատարելով թուրքական բանակի աղբյուրներին, հայտնել էր, որ Թուրքիան ռազմական տեխնիկա է տեղափոխում հարևան երկիր: Այդ տեղեկությունները հաստատվել էին ականատեսների վկայությամբ:
Ավելի վաղ Անկարան պաշտոնապես խոստացելէր դաժանորեն վրեժխնդիր լինել քրդերից, որոնք հերթական հարձակումներն են իրականացնում Թուրքիայի տարածքում, ինչի արդյունքում մոտ 25 թուրք զինվորականներ և ոստիկաններ են սպանվել:
