Մեծամորի ատոմային կայանը կառուցված է 9 բալանոց երկարաշարժի գոտու համար և միակ ԱԷԿ-ն է նախկին ԽՍՀՄ-ում, որ նման սեյսմակայունություն ունի: Նման հայտարարություն այսօր Ազգային ժողովի հերթական նիստում արեց ՀՀ էներգետիկայի և բնական պաշարների նախարար Արմեն Մովսիսյանը՝ պատասխանելով պատգամավոր Արմեն Մարտիրոսյանի հարցին, թե ԱԷԿ-ի անվտանգությունն ինչ վիճակում է՝ հաշվի առնելով Թուրքիայում տեղի ոնեցած երկրաշարժը և թուրքական կողմի բարձրացրած հիստերիան Հայկական ԱԷԿ-ի հետ կապված:
Ա. Մովսիսյանի խոսքով՝ ԱԷԿ-ում վերջերս են ավարտվել OSART-ի առաքելության ստուգումները, և եզրակացությունը դրական է. «Թուրքական կողմի հիստերիան քաղաքական հեռահար նպատակ ունի՝ թույլ չտալ նոր ԱԷԿ-ի կառուցումը և Հայաստանը դնել էներգետիկ լարված վիճակում»: Նախարարը շեշտեց, որ ԱԷԿ-ը միջազգային կառույցների մոնիտորինգի տակ է, և որևէ խնդիր չկա, երբևէ անվտանգության խնդիր չի առաջացել:
Պատգամավոր Արծվիկ Մինասյանի հարցին, թե ի՞նչ վիճակ է ԱԷԿ-ում աշխատավարձերի խնդրի հետ կապված, նախարարը պատասխանեց, որ օպերատիվ անձնակազմի աշատավարձի միջին չափը 277 հազ. դրամ է (նվազագույնը՝ 140 հազ. դրամ, առավելագույնը՝ 550 հազ. դրամ), ինչը 2.5 անգամ բարձր է համակարգի մյուս ընկերություններում եղած աշխատավարձից: Ա. Մովսիսյանի խոսքով՝ ԱԷԿ-ի աշխատավարձի ֆոնդը 4.5 մլրդ դրամ է, այսինքն՝ 50%-ով ավելացումը ենթադրում էր կամ էլէներգիայի ինքնարժեքի բարձրացում, կամ այլ աղբյուր պետք է գտնել. «Պահանջը ճիշտ է, բայց նաև հնարավորությունների խնդիր կա»:
Նա հայտնեց, որ աշխատակազմի հետ ընդհանուր հայտարարի են եկել, իսկ հետագայում կտեսնեն, թե ինչ հնարավորություններ են բացվում. «Լուծումներից մեկը ներքին շուկայում սպառման մեծացումն է, արտահանման նոր հնարավորություններ գտնելը, Իրանի հետ ծանրաբեռնված աշխատում ենք, բայց հնարավոր է դեպի Թուրքիա և այլ ուղղություններ գտնել»:
Պատգամավոր Արա Նռանյանի հարցին, թե ինչ խնդիրներ կան Հայաստանի բաշխիչ ցանցերում, Ա. Մովսիսյանը պատասխանեց. «Տարածաշրջանում մեր էներգետիկ համակարգը լավագույնն է: Դա ոչ միայն իմ, այլև միջազգային փորձագետների կարծիքն է: Բնական է, որ տարբեր ձևերով պետք է փորձեն խանգարել այս համակարգի զարգացմանը»:
Նրա խոսքով՝ ՀՀ էներգետիկ հզորություների մեծ մասը 40-50 տարվա մաշված է, բայց հաջողվել է կայուն համակարգ ստեղծել, և հիմա մենք զարգացման փուլում ենք: Նախարարը նշեց, որ անհանգստանալու խնդիր չկա, ընդամենը մեր երկրի խոշոր ընկերություններից մեկում հարկային ստուգումներ են գնում, որոնց ավարտից հետո կերևա՝ արդյոք խնդիր կա՞, թե՞ ոչ:
Միաժամանակ նա նշեց, որ ձմռան նախապատրաստական աշխատանքներն ավարտված են, և համակարգը պատրաստ է:
