ԱՄՆ փոխնախագահ Ջոզեֆ Բայդենը, որը արդեն համաձայնություն է տվել աջակցելու ԱՄՆ ներկայիս նախագահ Բարաք Օբամային հաջորդ տարի կայանալիք նախագահական ընտրություններում, չի բացառում, որ կարող է մասնակցել 2016 թ. ընտրություններին:
«Ես դեռ վերջնականապես այս հարցի վերաբերյալ որոշում չեմ կայացրել»,- հայտարարել է Միացյալ Նահանգների երկրորդ մարդը CNN հեռուստաընկերությանը տված հարցազրույցում:
Ինչպես հաղորդում է ԻՏԱՌ-ՏԱՍՍ գործակալությունը, փոխնախագահը խոստովանել է, որ չնայած իր 68-ամյա տարիքին, ինքը, «հավանաբար», գտնվում է իր կյանքի ամենածաղկուն շրջանում: «Ես ինձ հրաշալի եմ զգում, ինձ դուր է գալիս իմ աշխատանքը: Եվ այնքան ժամանակ կզբաղվեմ դրանով, որքան կունենամ դրա հնարավորությունը»,- ասել է Բայդենը:
Ջոզեֆ Բայդենը երկրի ղեկավարի պաշտոնի համար երկու անգամ`1988 և 2008 թթ. առաջադրվել է: Եթե առաջին քարոզարշավի ժամանակ նրա շանսերը բավական բարձր էին գնահատվում, ապա երեք տարի առաջ դեմոկրատ քաղաքական գործիչը անգամ չէր դիտվում որպես նախագահական քարոզարշավի առաջնորդ:
Բայդենի դեմ է նաև վիճակագրությունը` ԱՄՆ ամբողջ պատմության մեջ նախագահի աթոռին չի նստել 70-ից մեծ տարիք ունեցող որևէ թեկնածու: Վերջինս ընտրությունների ժամանակ կլինի արդեն 73 տարեկան: Նրանից ընդամենը մեկ տարով էր երիտասարդ Ջոն Մակ-Քեյնը, որը 2008 թ. նախագահական ընտրություններում զիջեց Օբամային:
ԱՄՆ ամենատարիքով նախագահը եղել է Ռոնալդ Ռեյգանը, որը նախագահի աթոռին է նստել 69 տարեկան հասակում: Վերջինս երկրի ղեկավարի պաշտոնը զբաղեցրել է մինչև 78 տարեկանը:
