ITAR-TASS-ի և Trend-ի փոխանցմամբ, այսօր լրագրողների հետ ճեպազրույցում ԱՄՆ պետքարտուղարի օգնական Ֆիլիպ Գորդոնը հայտարարել է, որ ԱՄՆ-ն ողջունում է Ռուսաստանի գործողությունները Լեռնային Ղարաբաղի խնդրի կարգավորման գործում և այս հարցում ակնկալում է համագործակցություն:
Նա նշել է, որ ԵԱՀԿ վերջին գագաթնաժողվի ժամանակ Աստանայում «Լեռնային Ղարաբաղը եղել է քննարկումների հիմնական թեմաներից մեկը», իսկ Մինսկի խումբը, Ադրբեջանի և Հայաստանի ղեկավարների հետ միասին, հանդես է եկել հայտարարությամբ: «Մենք մտահոգություն ենք հայտնում գոյություն ունեցող հակասությունների, ինչպես նաև այն հակամարտությունների կապակցությամբ, որոնք վերջին շրջանում կան տարածաշրջանում: Սա վտանգավոր իրավիճակ է, որը շեշտում է առաջընթացի հասնելու ինտենսիվ ջանքերի անհրաժեշտությունը»,- ասել է Գորդոնը:
Նա չի համաձայնել այն մտքի հետ, թե «Լեռնային Ղարաբաղի հարցում ԱՄՆ-ն քիչ հետաքրքրություն է ցուցաբերում»: «Այո, Ռուսաստանն այս գործընթացում ակտիվ դերակատարություն ունի, և մենք ակնկալում ենք, որ նա, ինչպես և ԱՄՆ-ն, ցանկանում է հասնել համաձայնության, որը հիմնված կլինի ԵԱՀԿ Մինսկի խմբի կողմից առաջ քաշված առանցքային սկզբունքների վրա»,- ավելացրել է պետքարտուղարի օգնականը: «Վաշինգտոնը մշտական կապի մեջ է բոլոր կողմերի հետ և շատ հետաքրքրված է այս հակամարտության կարգավորմամբ»:
