«Ազատ դեմոկրատներ» կուսակցության անդամ, ՀՀ նախկին արտգործնախարար Ալեքսանդր Արզումանյանն «Առաջին լրատվականի» հետ զրույցում շեշտեց, որ «Ազատ դեմոկրատներ» կուսակցությունն աշխատում է, ակտիվ գործընթացներ են ընթանում և իրենց համար անընդունելի ու անհասկանալի են հայտարարությունները, թե օտար երկրների ցանկությամբ Հայաստանում ինչ-ինչ ուժեր ու միավորումներ են ձևավորվելու:
«Որևէ օտար երկիր իրավունք չունի միջամտելու Հայաստանի ներքին գործերին: Ում մոտ որ նման մտքեր են ծագում, պետք է նախ ուսումնասիրեն Հայաստանի օրենսդրությունը: Մենք ընդհանրապես մերժում ենք օտար ուժերի միջամտությունը Հայաստանի ներքին կյանքին»,- ընդգծեց Արզումանյանը և հավելեց, որ նման մտքերը շատ վտանգավոր են, ինչպես նաև նման եզրահանգումներն են վտանգավոր:
Նշենք, որ այսօր մամուլում տարածվել էր տեղեկատվություն, թե Միացյալ Նահանգները ցանկանում է Հայաստանում ստեղծել արևմտամետ-լիբերալ բլոկ՝ ի դեմս «Հանրապետություն», «Ժառանգություն» և «Ազատ դեմոկրատներ» կուսակցությունների:
«Նման բան գոյություն չունի, մենք առաջին անգամ ենք լսում, մանավանդ որ՝ «Հանրապետություն» կուսակցությունը ՀԱԿ-ի անդամ է և երբևէ չի հայտարարել, որ ՀԱԿ-ից դուրս է գալու: Ինչ վերաբերում է «Ժառանգությանը», ապա նրանց հետ մենք շատ նորմալ հարաբերություններ ունենք և համագործակցում ենք տարբեր հարցերի շուրջ»:
