ԱՄՆ պետքարտուղարի տեղակալ Ուիլյամ Բըրնսը, ով ժամանել է Հայաստան, Սերժ Սարգսյանի հետ հանդիպմանը հայտարարել է, թե իր` Հայաստան կատարած այցը ցույց է տալիս, թե որքան կարևոր առաջնահերթություն է Հայաստանն ԱՄՆ համար: Երբ այդ իրողությունը փորձում ենք համադրել նաև Նիկոլա Սարկոզիի հայաստանյան այցին ու դրանից հետո էլ Հայաստանի նախագահին ու արտգործնախարարին գրած նամակներին, ապա ակնհայտ է դառնում, թե ԵԱՀԿ Մինսկի խմբի արևմտյան երկու համանախագահ երկրները վերջին շրջանում որքան մեծ կարևորություն են սկսել տալ Հայաստանի հետ հարաբերությանը, սկսել են մեծ ուշադրություն դրսևորել Հայաստանի հանդեպ:
Ի՞նչն է խնդիրը: Արդյո՞ք դա կապված է Սերժ Սարգսյանի առաջիկա մոսկովյան այցի հետ: Բանն այն է, որ այդ ուղղությամբ իսկապես լուրջ զարգացումներ են նախանշվում, քանի որ նախագահական պաշտոնին վերատիրացող Պուտինը նաև որոշել է վերականգնել Խորհրդային Միությունը` թեկուզ ուրիշ անունով ու կառուցվածքով: Ըստ երևույթին Արևմուտքի համար ներկայիս պահն անկեղծության պահն է, և այդ իսկ պատճառով էլ փորձում են արդեն առավելագույնս անկեղծ լինել Հայաստանի հետ հարաբերություններում և բաց տեքստով ներկայացնել իրավիճակը, իրենց ակնկալիքներն ու նպատակները: Արևմուտքը Հայաստանում, ըստ երևույթին, սկսել է խաղալ բաց խաղաքարտերով:
Այստեղ Հայաստանի համար միաժամանակ թե՛ վտանգներն են շատ, թե՛ հնարավորությունները: Ամեն ինչ կախված է նրանից, թե արդյոք Հայաստանի իշխանությունն ու քաղաքական սուբյեկտները նման բաց խաղի պայմաններում ինչպիսի՞ մոտեցում կդրսևորեն` կնախընտրեն արձագանքե՞լ այդ բաց քաղաքականությանը, թե՞ կփորձեն պահպանել Հայաստանի քաղաքական կյանքի հիմնականում ինտրիգային բնույթը, որտեղ գրեթե բոլորը իրենց շատ հարմար են զգում, և կարևորը` այդ հարմարության հետ մեկտեղ պատասխանատու չեն զգում երկրի իրավիճակի ու ճակատագրի համար:
Սակայն ներկայում իսկապես անկեղծության պահն է, նաև Հայաստանի իշխանության ու քաղաքական դաշտի համար, որովհետև կա՛մ նրանք կցուցաբերեն ադեկվատություն ժամանակի և առկա միջազգային քաղաքական միտումների հանդեպ, կա՛մ մեկընդմիշտ պարզ կդառնա, որ Հայաստանի ներկայիս քաղաքական համակարգը ի զորու չէ համարժեք արձագանքել պետության և հանրության կենսական անհրաժեշտություններին:
