Грузия Online-ի փոխանցմամբ՝ Վրաստանի նախագահ Միխեիլ Սաակաշվիլին պետծառայողների հետ հանդիպման ժամանակ անդրադարձել է Վրաստանի պետական ապարատի խնդիրներին, ինչպես նաև Հայաստանի Տավուշի մարզում տեղի ունեցած սողանքին.
«Կանադական հեղինակավոր միջազգային կազմակերպությունը հետազոտություն է անցկացրել աշխարհի 80 երկրներում՝ պարզելու համար նրանց պետական ապարատների աշխատանքի արդյունավետությունն ու թափանցիկությունը։ Վրաստանի պետական ապարատը հայտնվել է երկրորդ տեղում՝ զիջելով միայն Նոր Զելանդիային։ Մենք մեր հետևում ենք թողել այնպիսի երկրների, ինչպիսիք են Ֆրանսիան, Գերմանիան, Ճապոնիան, էլ չենք խոսում Ռուսաստանի մասին։
Ինչ վերաբերում է հայ-վրացական սահմանին տեղի ունեցած ողբերգական դեպքին (սողանք), ապա դրա արդյունքում զոհվել են մեր մի քանի քաղաքացիներ, ինչը շատ ցավալի փաստ է։ Վրաստանի մի քաղաքացի՝ վարորդ, որն այստեղ հողին է հավասարեցնում մեր կառավարությանը, այնտեղ՝ Հայաստանում, հեռուստախցիկների առջև հայտարարում է. «Եթե մեր կառավարությունը լիներ, մի՞թե երկու ժամում չէր մաքրի այդ փլվածքը։ Տեսե՛ք, թե որքան ժամանակ էր անցել, սակայն ոչ ոք չէր եկել՝ ճանապարհը մաքրելու»։
Ես չեմ ցանկանում որևէ վատ բան ասել Հայաստանի հասցեին, նրանք մեր ընկերներն են։ Սակայն Ռամազ Նիկոլաիշվիլին (Վրաստանի ենթակառույցների ու տարածաշրջանային զարգացման նախարար.- 1in.am) մի քանի ժամում դրանից ավելի բարդ իրավիճակում է լուծում գտել։ Մինչդեռ Հայաստանում դրա համար պահանջվել է գրեթե երկու շաբաթ։ Ահա թե ինչ է նշանակում արդյունավետ պետական ապարատ ունենալը»։