Եգիպտոսի նախկին վարչապետ Ատեֆ Օբեյդայի դեմ սկսվել է դատական գործընթաց: Ինչպես հաղորդում է Reuters գործակալությունը, վերջինս մեղադրվում է պետությանը պատկանող կղզու անօրինական վաճառքի մեջ:
Մեղադրող կողմի տվյալներով`1999-2004 թթ. Եգիպտոսի կառավարությունը ղեկավարած Օբեյդան Լուքսոր քաղաքի պատմական կենտրոնի մոտ գտնվող Ալ-Բայյադիա կղզին վաճառել է Հուսեյն Սալեմին: Վերջինս, ինչպես նշվում է, մտերիմ է եղել երկրի նախկին նախագահ Հոսնի Մուբարաքի հետ:
Այդ գործով դատական գործընթաց է սկսվել երկրի նախկին կառավարության 5 բարձրաստիճան պաշտոնյաների դեմ: Դատավարության հաջորդ նիստը տեղի կունենա 2011 թ. նոյեմբերի 19-ին:
Օբեյդան ձերբակալվել է այս տարվա հուլիսին: Գործարար Սալեմին հաջողվել է թաքնվել Իսպանիայում, սակայն եգիպտական կողմի խնդրանքով տեղի իշխանությունները ձերբակալել են նրան: