Լոս Անջելեսի դաշնային իշխանությունները ձերբակալել են 14 բժիշկների, որոնք մեղադրվում են անօրինական կերպով, հիմնականում ապահովագրական գործակալությունների միջոցով, OxyContin դեղահաբեր ստանալու և վաճառելու մեջ: Ձերբակալվածների թվում կան երկու հայ բժիշկներ` 43-ամյա Մայք Միքայելյանը և 52-ամյա Անժելիկա Սանամյանը, որոնք էլ հենց ղեկավարել են հանցախումբը:
Մեղադրանքում նշվում է, որ հանցախմբի անդամները դուրս են գրել ուժեղ ցավազրկող դեղահաբեր ապահովագրություն չունեցող հիվանդների համար, որոնք դրանց կարիքը չեն ունեցել, ինչպես նաև կեղծ ստացականների դիմաց դեղահաբեր են ձեռք բերել դեղատներից և վերավաճառել: Այդպիսով կազմակերպության անդամներն անօրինական ճանապարհով փողոցներում վերավաճառել են ավելի քան 1 մլն դեղահաբ` 23-27 դոլարով՝ ստանալով միլիոնավոր դոլարի եկամուտ:
Ձերբակալվածներին մեղադրանք է ներկայացվել թմրանյութերի անօրինական վաճառքի և բժշկական խարդախությունների մեջ: Միքայելյանը, բացի դրանից, մեղադրվում է նաև OxyContin դեղահաբերի մեծածախ առևտրի մեջ: Նրանց պատժի առավելագույն չափը կլինի 10-40 տարի:
