Կահիրեում այս գիշեր մտցվել է պարետային ժամ այնտեղ սկսված բախումների պատճառով: Տեղի ղպտի քրիստոնյա համայնքի և ոստիկանության միջև սկսված մարտերի հետևանքով զոհվել է առնվազն 24 մարդ: Այս մասին հաղորդում է BBC-ն:
Այսօր առավոտյան պետք է կայանա Եգիպտոսի ժամանակավոր կառավարության արտակարգ նիստը, որը կքննարկի ստեղծված իրավիճակը: Այս բախումներն ամենաարյունալին են Հոսնի Մուբարաքի պաշտոնանկությունից հետո: Ինչպես հաղորդում է Reuters գործակալությունը, ամեն ինչ սկսվել է այն բանից հետո, երբ Ասուան նահանգում արգելվել է նոր եկեղեցու կառուցումը: Այդ ժամանակ բախում է տեղի ունեցել քրիստոնյաների և, նրանց կարծիքով, քաղաքացիական հագուստով ոստիկանների միջև:
Նշվում է նաև, որ երեկ պետական հեռուստատեսությունը դիմել է Կահիրեի բնակիչներին` օգնելու ոստիկանությանը քրիստոնյաների դեմ պայքարում: Սակայն մինչ այս կոչը քաղաքում հայտնվել են փայտերով և ձողերով զինված մարդիկ, որոնք բղավում են «վերջ տանք քրիստոնյաներին» կոչերը: Այս պահին հայտնի է նաև, որ մի քանի հարյուր մարդ վիրավորվել է:
