«Կառավարության տնտեսական քաղաքականությունը պետք է փոխվի»,- այսօր լրագրողների հետ հանդիպման ժամանակ նշեց «Հայրենական ապրանքարտադրողների միության» նախագահ Վազգեն Սաֆարյանը` քննադատելով վարվող տնտեսական քաղաքականությունը: Նրա փաստմամբ` հաջորդ տարվա համար նախատեսված բյուջետային ծախսերը, դեֆիցիտները չեն համապատասխանում զարգացող երկրի ցուցանիշներին:
«Ներկա բյուջետային համամասնությունները չեն կարող գոհացնել, քանի որ հեռու են բավարար լինելուց: Կան վտանգներ և ռիսկեր, արժութային բանկն անընդհատ կառավարության ուշադրությունը սևեռում է հարկային համամասնությունների վրա: Մեր բյուջեի դիֆիցիտն ավելի նվազ է լինելու»,- նշեց Վ. Սաֆարյանը` հավելելով, որ կառավարության հետ երկխոսության մեջ են, որպեսզի փոխվի տնտեսական քաղաքականությունը, որը սոցիալական ուղղվածություն պետք է ունենա: Ըստ բանախոսի` պետք է ներդրումներ կատարել արդյունաբերության մեջ, քանի որ մեր տնտեսության հիմնական բացթողումը սա է:
«Մենք պահանջում ենք արդյունաբերական քաղաքական հայեցակարգ: Մենք քիչ ենք տեսնում պետության կարգավորիչ դերը, տնտեսությունը ստվերային է, պետք է լինի նաև ներդրումային քաղաքականությունը»,- մեկնաբանեց Վ. Սաֆարյանը` ընդգծելով, որ տնտեսությունն օլիգարխիկ և ստվերային է: «Կան օլիգարխիկ, մոնոպոլիական տնտեսություններ»,- նշեց Վ. Սաֆարյանը` հույս հայտնելով, որ կառավարությունը այս սպառողական բյուջեներից կգա ներդրումային բյուջեների հիմքին, որովհետև սա է այս ոլորտի տեսլականը: Նրա հավաստիացմամբ` հարկերը չեն բարձրացվում, պարզապես տնտեսությունն է ընդլայնվում, այդ պատճառով ավելանում է հարկահավաքությունը: Վ. Սաֆարյանի համոզմամբ` զարգացող երկրում ստվերայնությունը պետք է քչանա, և պետք չէ ամեն բան թողնել ինքնահոսի, պետք է շուկան լինի կարգովորվող:
