««Ժառանգությունն» առաջ է գնալու, հետ չի նայելու»,- այսօր ԱԺ-ում կայացած բրիֆինգի ժամանակ ասաց «Ժառանգության» ԱԺ պատգամավոր Արմեն Մարտիրոսյանը` արձագանքելով Լևոն Զուրաբյանի այն հայտարարությանը, որ իբր Րաֆֆի Հովհաննիսյանը և մյուսները գնացել են Ազատության հրապարակի ֆոնին նկարվելու:
Նա նշեց, որ Լևոն Զուրաբյանն է մոտեցել Րաֆֆի Հովհաննիսյանին, բացի այդ` իրենք գնացել են զորակցելու ժողովրդին: Անահիտ Բախշյանը նկատեց, որ դժվարությամբ հասան բրիֆինգին, բայց հույս հայտնեց, որ օրը հաղթանակով կավարտենք` նկատի ունենալով մեր ֆուտբոլիստների խաղը: Թե՛ Անահիտ Բախշյանը, թե՛ Արմեն Մարտիրոսյանը բարձր գնահատեցին ԵԽԽՎ-ում Զարուհի Փոստանջյանի գործունեությունը: Ավելին` նկատեցին, որ կհասնեն նրան, որ Լեռնային Ղարաբաղի անկախությունը ճանաչվի:
Իսկ Լարիսա Ալավերդյանն իր հերթին նկատեց, որ, ցավոք սրտի, ինքը, թե կառավարության հետ հարցուպատասխանի ընթացքում ստացավ իր հարցի պատասխանը` կապված Սևանի օր-օրի վատացող վիճակի հետ, քանի որ բնապահպանության նախարարն այնպես ներկայացրեց ստեղծված իրավիճակը, որ մի բան էլ Սևանի վիճակը գնալով լավանում է: Նաև ավելացրեց, որ տեղին չի համարում բնապահպանության նախարարի իրեն հասցեգրված այն մեղադրանքը, որ իբր օգտվում է կասկածելի աղբյուրներից:
Ինչ վերաբերում է այն հարցին, թե Ռոբերտ Քոչարյանն ինչ ուժերով կվերադառնա, նա նշեց, որ Քոչարյանի հենարանը կարող են լինել միայն այն ուժերը, որոնք միշտ նրան սատարել են: Իսկ Անահիտ Բախշյանը ավելացրեց, որ «Ժառանգությունն» իր հոգեկերտվածքով, բառապաշարով ամեն ինչ անելու է, որ Քոչարյանը չգա:
Իսկ վերջում Արմեն Մարտիրոսյանն ավելացրեց, որ« Ժառանգությունն» առաջ է գնալու, հետ չի նայելու: ԱԺ բրիֆինգներին ներկայացած ՕԵԿ խմբակցության ղեկավար Հեղինե Բիշարյանին և Հովհաննես Մարգարյանին լրագրողները հարցեր չուղղեցին: ՕԵԿ պատգամավորները նեղացած լքեցին բրիֆինգների սրահը:
