Նախկինում աշխարհում գերազանցում էին փոքր բիզնեսները և շեշտը դրվում էր արտադրանքի որակի, հարատևության և կատարողական վարպետության վրա, և առհասարակ՝ արհեստները և արվեստները ավելի մոտ էին միմյանց։ Արտադրանքը ֆունկցիոնալ իմաստ ուներ, ուղղված էր կյանքի այս կամ այն կողմը լավացնելուն, ստեղծագործ պրոցեսները ավելի էֆեկտիվ դարձնելուն: Այս մասին «Առաջին լրատվականի» հետ զրույցում ասաց «Ինստիգեյթ» ՓԲԸ հիմնադիր և գլխավոր ինժեներ Վահագն Պողոսյանը` այսպիսի գնահատական տալով այն աշխարհին, որը գոյություն ուներ մինչ Apple ընկերության հիմնադիր Սթիվ Ջոբսը:
Նրա խոսքով`այս համատարած կորպորատիվ մրցավազքում Սթիվ Ջոբսը հիշեցրեց մարդկությանը նախկին վարպետաց ավանդույթները, ցույց տվեց, որ շեշտը դնելով որակյալ, ոչ պարտադիր էժան ապրանքի վրա՝ ոչ միայն կարելի է դիմակայել դաժան մրցակցությանը, այլև համակցել բիզնեսի բարգավաճումը կյանքի որակի բարձրացման հետ։ «Ավելին՝ իր մոտեցումով նա պարտադրեց մրցակիցներին նույնպես հետևել այդ օրինակին, և այսօր նկատելի է մտածելակերպի և գործելակերպի առողջացում ոչ միայն Apple ընկերության անմիջական մրցակիցների, այլև բոլորովին այլ ոլորտներում, նույնիսկ ոչ առևտրական»,- նշեց նա:
Իր ողջ կյանքի ընթացքում Սթիվ Ջոբսը ստեղծեց ապրանքներ, որոնք, նրա խոսքով, իրոք կարող են բարեփոխել մարդկանց կյանքը։ «Իհարկե, սպառողական բնազդին տրված՝ մարդիկ այսօր նույն կերպ շարունակում են գնել նաև թանկ ապրանքը, բայց գնալով ավելի է մեծանում նրանց թիվը, ովքեր լիարժեք օգտագործում են այդ սարքերի բոլոր հնարավորությունները»,- նշեց նա` ընդգծելով, որ արտադրանքի որակը, օգտագործման պարզությունը և հարատևությունը թույլ են տալիս մարդկանց ոչ թե պարզապես ունենալ այդ սարքերը, այլ իրոք գործածել դրանք՝ դարձնելով կենցաղի մի մասը, ինչպես ժամանակին դա արվեց ժամացույցի, հեռախոսի, ավտոմեքենայի հետ, այլ կերպ ասած`Apple ընկերության արտադրանքում արհեստը և արվեստը կրկին միասին են հանդես գալիս։
