Ադրբեջանական ANS PRESS-ի փոխանցմամբ՝ Ադրբեջանի արտգործնախարար Էլմար Մամեդյարովը RT-ի (Russia Today) արաբալեզու հեռուստաալիքին տված հարցազրույցի ժամանակ անդրադարձել է Ղարաբաղյան հակամարտության կարգավորմանը.
«Լեռնային Ղարաբաղի կարգավիճակը պետք է համատեղ որոշեն հայ և ադրբեջանական համայնքները։ Առաջին հերթին մենք պետք է պայմաններ ստեղծենք դրա համար, մինչդեռ «օկուպացված» տարածքների դեպքում անհնար է դառնում կարգավիճակի կամավոր հստակեցման մասին խոսելը, ինչի մասին այդպես համառորեն խոսում է հայկական կողմը։
Ադրբեջանը՝ որպես «օկուպացված» տարածքների ու փախստականների համատեքստում տուժած երկիր, հանդիսանում է այն բանի ամենակատաղի կողմնակիցը, որ հակամարտության կարգավորման գործընթացն առաջ շարժվի մեռյալ կետից։ Մեկ գիշերվա ընթացքում անհնար է հակամարտության կարգավորումը։
Դրա համար էլ մենք՝ սկսած 7 տարի առաջ Պրահայում կայացած բանակացային հերթական փուլից, հասկացել ենք, որ այս խնդիրը պետք է լուծվի փուլ առ փուլ, այսինքն՝ բանակցային սեղանը պետք է աստիճանաբար մաքրել զինված հակամարտության ամենաբացասական հետևանքներից։
Եթե գոյություն ունի տարածքների «օկուպացում», «զավթում», դրանց «էթնիկ մաքրում», ինչպես նաև իրենց բնակավայրերից վտարված մարդիկ, ապա բավական բարդ է գործընթացում առաջընթաց և բեկում գրանցելը։ Ընդհանուր առմամբ, մենք պատկերացնում ենք «ճնապարհային քարտեզի» կոնցեպցիան, թե ինչպես և ուր պետք է առաջ շարժվենք։ Ես կարծում եմ, որ Հայաստանը նույնպես հասկանում է, որ ներկայումս գոյություն ունեցող ստատուս-քվոն ոչ միայն անընդունելի է, այլև խոչընդտում է ողջ տարածաշրջանի զարգացմանը»։