Այսօր ռուսական НГ թերթը ներկայացրել է մի վերլուծություն, համաձայն որի` ռուսական զենքն ու զինամթերքը դուրս են մղվում ԱՊՀ շուկաներից: Դրան նպաստում է մեծածավալ ռազմատեխնիկական ծրագրերի բացակայությունը ԱՊՀ երկրների միջեւ, ինչպես նաեւ նախաձեռնողականության բացակայությունը:
Այս խնդիրն այսօր քննարկելու է ԱՊՀ պաշտպանության նախարարների խորհուրդը, որը գումարվում է ուկրաինական Յալթա քաղաքում: ԱՊՀ կազմակերպությունում սա միակ պաշտպանական-խորհրդատվական մարմինն է, որը համակարգում է պաշտպանական-ռազմական գերատեսչությունների համագործակցությունը:
Ռազմատեխնիկական ոլորտում համագործակցության բացակայությունը ստիպում է Հավաքական անվտանգության կազմակերպության անդամ երկրներին` իրենց զենքի արդիականացման համար դիմել այլ երկրների օգնությանը, թեեւ նրանց զենքի 90%-ն արտադրված է Ռուսաստանում:
Ռուսաստանն ինքն էլ զենք եւ զինամթերք է գնում արտասահմանում: Օրինակ` մեկ շաբաթ առաջ իսրայելական պաշտպանական կոնցերնը հաղորդագրություն է տարածել առ այն, որ Ռուսաստանը $400 մլն-ի անօդաչու ինքնաթիռներ է գնել Իսրայելից: Ղազախստանը ռազմական համագործակցության պայմանագիր է ստորագրել Հարավային Կորեայի հետ: Շատ փորձագետների կարծիքով, Ռուսաստանն առաջիկա 5-6 տարիների ընթացքում Իսրայելից եւ եվրոպական երկրներից կգնի մոտ $10 մլրդ-ի զենք եւ զինամթերք:
Այս հարցի լուծման ռուսական տեսակետի վերաբերյալ փորձագետների կարծիքները կարդացեք НГ թերթի հոկտեմբերի 20-ի համարում: