Իսպանիայում մոլեգնող հրդեհներն արդեն մոտ 50 հազար հեկտար անտառ են ոչնչացրել երկրի տարբեր տարածաշրջաններում: Այս մասին հաղորդում է EFE գործակալությունը:
Հաղորդվում է, որ Կաստիլիա և Լեոնի Ինքնավար Համայնքում տարերքի դեմ պայքարը բարդանում է քամու սաստիկ պոռթկումների և չոր ամպրոպների պատճառով: Լեոնի նահանգում հրդեհի պատճառով տարհանվել է մոտ 8000 մարդ:
Տեղական զանգվածային լրատվամիջոցների տվյալներով՝ հրդեհների հետևանքով արդեն 3 մարդ է զոհվել, գրեթե 20-ը՝ տուժել: Ավելի վաղ Իսպանիայի իշխանություններն օգնություն են խնդրել ԵՄ-ից հրդեհը մարելու հարցում: Արդյունքում հայտարարվել է, որ ԵՄ-ն թագավորություն կուղարկի երկու ինքնաթիռ՝ տարերքի դեմ պայքարում օգնության համար:
Ընդհանուր առմամբ, տարեսկզբից ի վեր Իսպանիայում հրդեհներն այրել են մոտ 105 հազար հեկտար հողատարածք, ինչն ավելի քան կրկնակի գերազանցում է 2024 թվականի ընդհանուր թիվը:
Ըստ El País թերթի՝ Սամորայի նահանգում օգոստոսի 10-ին սկսված հրդեհը կարող է դառնալ Իսպանիայում գրանցված հրդեհներից խոշորագույնը: Դրա տարածությունը կազմում է 38 հազար հեկտար: Կրակի մարումը տեղի է ունենում ծայրահեղ շոգի ֆոնին: Կանխատեսումների համաձայն՝ մի շարք տարածաշրջաններում օդի ջերմաստիճանը կարող է գերազանցել 40 աստիճանը:
