ՀՀ կրթության, գիտության, մշակույթի և սպորտի նախարարի տեղակալ Արաքսիա Սվաջյանը Կրթական տեխնոլոգիաների ազգային կենտրոնում ներկա է եղել Հայաստանի տեղեկատվական համակարգերի գործակալության՝ թվայնացման նպատակով իրականացրած հետազոտությունների արդյունքների քննարկմանը:
«Ստանալ կրթություն» ծրագրի շրջանակում կյանքի իրադարձությունների թվայնացման նպատակով իրականացվել է համապարփակ հետազոտություն՝ ներկայացնելով նախադպրոցական, հանրակրթական, մասնագիտական և բարձրագույն ուսումնական հաստատությունների ընդունելության հետազոտության արդյունքները։
Կրթական տեխնոլոգիաների ազգային կենտրոնում կազմակերպվել են աշխատարաններ՝ ուսումնասիրության արդյունքները քննարկելու, քաղաքացիների բարձրացրած հիմնական խնդիրները վերլուծելու, ինչպես նաև համատեղ լուծումներ առաջարկելու նպատակով՝ ուղղված կրթական հաստատությունների ընդունելության գործընթացի հեշտացմանը և ամբողջությամբ թվայնացմանը։
Հետազոտություններն իրականացվել են քաղաքացիների շրջանում անցկացված հարցումների հիման վրա կատարված ուսումնասիրությունների արդյունքում:
««Ստանալ կրթություն» ծրագրի շրջանակում փորձում ենք վերանայել արդեն իսկ ունեցած թվային համակարգերը կամ քննարկել նոր համակարգերի անհրաժեշտությունը: Սա մեզ հնարավորություն է տալիս ապահովելու այնպիսի տեղեկատվական համակարգեր, որոնք քաղաքացու համար կլինեն ավելի ընկալելի ու հեշտ կիրառելի: Տեղեկատվական համակարգերի միջոցով քաղաքացիները կրթական բոլոր մակարդակներում որևէ գործընթաց նախաձեռնելիս կօգտվեն մեկ ամբողջական հարթակից, որը կօգնի հեշտ կողմնորոշվել՝ ունենալով քայլերի հստակ հաջորդականություն»,- ասել է ԿԳՄՍ նախարարի տեղակալ Արաքսիա Սվաջյանը:
Նախարարի տեղակալի դիտարկմամբ՝ դեռևս անհրաժեշտություն կա կատարելագործելու նախադպրոցական հաստատությունների ընդունելության՝ Երևանի համակարգը, որը հետագայում կարող է կիրառելի դարձնել նաև այլ համայնքներում։ Նախադպրոցական ուսումնական հաստությունների թվայնացման տեղեկատվական համակարգն արդեն իսկ կրթության կառավարման տեղեկատվական համակարգերի շարքում է, որտեղ վարվում են նախադպրոցական բոլոր հաստատությունների գործունեությունն ու երեխաների ցուցանիշները:
«Հասել ենք կարևոր մի փուլի. շուտով կմեկնարկի առաջին դասարանցիների հայտագրման գործընթացը, որն ուսումնական հաստատություն ընդունվելու ամենակայացած համակարգերից է: Բայց այստեղ ևս որոշակի աշխատանքներ իրականացնելու անհրաժեշտություն կա. փորձում ենք համակարգն ավելի դյուրացնել»,- մեկնաբանել է նախարարի տեղակալը:
Ըստ Արաքսիա Սվաջյանի՝ մասնագիտական հաստատությունների՝ ուսումնարանների և քոլեջներ հայտագրումը ևս քանի տարի է՝ առցանց ձևաչափով է կատարվում, և այստեղ ևս քայլերը հնարավորինս պարզեցնելու խնդիր կա:
Բուհերի ընդունելության վերաբերյալ Արաքսիա Սվաջյանը նշել է, որ ընթացքի մեջ է բուհերի թվայնացման գործընթացը, որը ուղիղ կապ պետք է ունենա ընդունելության գործընթացի հետ:
Նշենք, որ այսօր ներկայացվել են նախադպրոցական և հանրակրթական ուսումնական հաստատությունների ընդունելության հետազոտության արդյունքները, իսկ վաղը կամփոփվի և կներկայացվի մասնագիտական և բարձրագույն ուսումնական հաստատությունների ընդունելության հետազոտությունը։
