Грузия Online-ի փոխանցմամբ՝ Վրաստանի նախագահ Միխեիլ Սաակաշվիլին Al Jazeera հեռուստաալիքին տված հարցազրույցի ժամանակ անդրադարձել է ռուս-վրացական հարաբերություններին.
«Ռուսաստանի հետ Վրաստանի հարաբերություններում գոյություն ունի երկու մակարդակ. սեր և ատելություն։ Ռուսաստանի կառավարությունը չի ճանաչում մեր սահմանները, չի ճանաչում ժողովրդավարական ճանապարհով ընտրված Վրաստանի իշխանությանը, չի իրագործում իր իսկ ստորագրած զինադադարի մասին համաձայնագիրը։
Ոչ վաղ անցյալում մամուլում հայտնվեց մի նյութ, որում Նիկոլա Սարկոզին պատմում է՝ ինչպես է Վլադիմիր Պուտինը գոռգոռացել, թե ցանկացել է կախել ինձ։ Ռուսաստանի հետ հարաբերությունների մաս է կազմում նաև այն հանգամանքը, որ Վրաստանի տարածքի 20 տոկոսն օկուպացված է, և ավելի քան կես միլիոն մարդ չի կարողանում վերադառնալ իր տուն, քանի որ ռուսական իշխանությունները վճռել են, որ Աբխազիան և Հարավային Օսիան նրանց բնակության վայրերը չեն։
Վրաստանի քաղաքացիները չեն կարող հայտնվել Ռուսաստանում։ Մինչդեռ Վրաստան են ժամանում ազգությամբ ռուս բազմաթիվ մարդիկ։ Իսկ ահա վրացիների համար գրեթե անհնար է դարձել Ռուսաստան ներթափանցելը։ Եթե լավ նայենք, ապա կտեսնենք, թե Վրաստան ժամանած ռուսները որքան հիացած են վերջին տարիներին մեր երկրի փոփոխություններով՝ չնայած մենք նավթ և գազ չունենք։ Վրաստանի ու Ռուսաստանի միջև տիրում է սեր և ատելություն»։
