Թուրքական աղբյուրները հայտնում են, որ արդեն թուրքական վեց ռազմական բեռնափոխադրող օդանավ է ուղևորվել Պակիստան՝ տեղափոխելով հակաօդային պաշտպանության համակարգեր, նաև հրթիռներ Բայրաքթար անօդաչուների համար: Դա տեղի է ունենում Հնդկաստանի ու Պակիստանի միջև իրավիճակի թեժացման կամ լարվածության աճի ֆոնին, որ տեղի է ունենում օրեր առաջ Քաշմիրում իրականացված խոշոր ահաբեկչությունից հետո:
Այդ ահաբեկչության զոհ էին դարձել մի քանի տասնյակ մարդ, մի քանի տասնյակը՝ վիրավորվել: Հնդկական մամուլը տեղեկություն տարածեց, որ Դելին տիրապետում է տեղեկատվության, որ Քաշիմիրում ահաբեկությանը առնչություն ունեն Պակիստանի հատուկ ծառայություններ: Իսլամաբադը կոշտ էր արձագանքել՝ պահանջելով ապացույցներ: Անցնող օրերին երկու երկրների սահմանին եղել են փոխհրաձգություն:
Ինչպես առիթ ունեցա անդրադառնալ այդ թեմային անցնող օրերին, կասկած չկա, որ այդ լարման վրա շատերը կփորձեն ձեռքեր տաքացնել, և Անկարան, թերևս, դրանց թվում է: Իհարկե, կա Պակիստանի հետ ռազմական գործընկերությունն ու գործնականում դաշնակցային հարաբերությունը, բայց խնդիրը, թերևս, դա չէ, որ Թուրքական կատարում է դաշնակցային պարտք: Կոնֆլիկտը Անկարային կարող է հնարավորություն տալ ավելացնել ազդեցությունը ռեգիոնում, այդպիսով հակազդելով ոչ միայն Հնդկաստանի քաղաքական կշռի ընդլայնմանը, որի արեալում Դելին դիտարկում է նաև Կովկասը, այլ նաև այդ կերպ բացելով կենտրոնասիական մեծ ռեգիոնի առնչությամբ իր դերը բարձրացնելու հնարավորություններ:
Նվազագույնը, Անկարան, թերևս, լավ է պատկերացնում, որ հնդկա-պակիստանյան լարվածությունը լոկ պահի տակ ստեղծվող իրավիճակ չէ, այլ աշխարհաքաղաքական ռեբուսի մի դրվագ, որն ամենևին պատահական չէ, որ ծագեց ԱՄՆ փոխնախագահ Ջեյ Դի Վենսի Հնդկաստան այցի օրը: Քաշիմիրում ահաբեկությունը տեղի ունեցավ հենց այդ օրը: Ի դեպ, ոչ պաշտոնական տեղեկություններ կան, որ այս օրերին Հնդկաստանում էլ վայրէջք են կատարել ամերիկյան ռազմատրանսպորտային օդանավեր:
Կբախվե՞ն այնտեղ ԱՄՆ ու Թուրքիայի շահերը, թե կարող է աշխատել այլ սցենար, երբ համատեղ թեժացնելով ռեգիոնը, փորձ կարվի բարձրացնել «ջերմությունը» Չինաստանի ուղղությամբ: Օրերս Մոսկվայում տեղի ունեցած Պուտին-Ուիթկոֆ հանդիպումից հետո ՌԴ նախագահի օգնական Ուշակովը հայտարարել էր, որ հաջողվել է ավելի մերձեցնել դիրքորոշումները ոչ միայն Ուկրաինայի հարցի, այլ նաև միջազգային այլ հարցերի վերաբերյալ:
Հատկանշական է, որ առայժմ Վաշինգտոնն ու Մոսկվան, կարծես թե, չեն շտապում դիրքորոշում արտահայտել Դելի-Իսլամաբադ լարվածության աճից բխող ռիսկերի վերաբերյալ: ՌԴ հետախուզության ղեկավար Նարիշկինը մի քանի օր առաջ Ադրբեջանում էր՝ Պակիստանի դաշնակից երկրում, որը միաժամանակ ՌԴ համար կարեւոր օղակ է Սանկտ Պետերբուրգից Մումբայ հնդկական նավահանգիստ հյուսիս-հարավ մեծ երթուղու համար, որ մի քանի տարի առաջ Իրանում բարձրաձայնեց ՌԴ նախագահ Պուտինը: Նարիշկինը Բաքվում խոսել էր Աֆղանստանի ապակայունացման վտանգների մասին, իսկ Բաքվի այցից հետո նաև բարձրաձայնել ԱՄՆ հետախուզության ղեկավարության հետը հանդիպելու հնարավորության մասին:
