Ադրբեջանական 1news.az-ին տված հարցազրույցի ժամանակ Քաղաքական սոցիոլոգիայի տնօրեն, ռուս քաղաքագետ Վյաչեսլավ Սմիռնովն անդրադարձ է կատարել ղարաբաղյան հակամարտության կարգավորմանը.
«Կարծում եմ՝ բանակցային գործընթացը չի կարող կանգնել, քանի որ ոչ ոք չի կարող մի կողմ քաշվել։ Այո՛, ներկայումս մենք գործընթացում տեսնում ենք որոշակի դադար, ինչը մասնակիորեն պայմանավորված է նրանով, որ բավական բարդ ժամանակներ են ապրում թե՛ ամերիկացիները, թե՛ եվրոպացիները։ Բարդ վիճակում է նաև Ռուսաստանը։
Այսինքն՝ ներկայումս որոշակի փոփոխություններ են կրել միջնորդների շեշտադրումները։ Սակայն ես կարծում եմ, որ շատ շուտով կսկսվի բանակցային գործընթացի նոր փուլ, և միջնորդները ոչ մի տեղ չեն կորչի։ Նրանք ակտիվ մասնակցություն կունենան դրանում։ Վստահ եմ, որ մինչև տարեվերջ մենք ականատես ենք լինելու բանակցությունների նոր փուլին»։
Սմիռնովն անդրադարձել է նաև Իսրայելի ու Թուրքիայի հարաբերությունների վատթարացմանը. «Եթե Իսրայելի ու Թուրքիայի միջև հարաբերությունների վատթարացումը շարունակվի նաև հետագայում, ապա Իսրայելը կընդունի Հայոց ցեղասպանությունը ճանաչող բանաձև»։