Այն ռազմավարությունը, որով Ռեյգանը սնանկացրեց ԽՍՀՄ-ին, և, ի վերջո, այն փլուզվեց, կարելի է և անհրաժեշտ է կիրառել Վենեսուելայի, Իրանի և Ռուսաստանի նկատմամբ: Այս մասին Forbes ամսագրի իր բլոգում գրել է ներդնող և գործարար Լուի Վուդհիլը: Արևմտյան լատվամիջոցների տեղեկություններով՝ նա անդամակցում է հեղինակավոր տնտեսական «Աճի ակումբին» (Club of Growth):
Այս ռազմավարությունը կիրառելու պատճառները, ըստ Վուդհիլի, մի քանիսն են: Իրանը շարունակում է զարգացնել իր միջուկային ծրագիրը, և արևմտյան ռմբակոծություններից ոլորտը փրկելու համար միջուկային գործարանները տեղափոխում է գետնի տակ: Ռուսաստանն ընդունել է ռազմական նոր ծրագիր, որով նախատեսում է ծախսել 635 մլրդ դոլար, իսկ Վենեսուելան փորձում է Չավեսի հռչակած «բոլիվարյան» հեղափոխությունը տեղափոխել լատինաամերիկյան երկրներ: «Ինչպե՞ս մենք կարող ենք պատասխանել մեր ազգային անվտանգության այս սպառնալիքներին»,- հարցնում է Վուդհիլն իր բլոգում:
Որպես լուծում՝ նա առաջարկում է կայունացնել դոլարը: Վուդհիլը նշում է, որ ուժեղ դոլարը, թերևս, ամենուժեղ զենքն էր, որով Ռեյգանը հաղթեց ԽՍՀՄ-ին: Ամրացնելով դոլարը՝ Ռեյգանը տապալեց նավթի գները, իսկ ԽՍՀՄ-ի տնտեսությունն այդ ժամանակ մեծապես կախված էր նավթադոլարներից, ինչը կտրուկ կրճատվեց` 1986 թ. այն կրճատվեց 73%-ով 1980 թ. համեմատ: Սրա արդյունքում ԽՍՀՄ-ը սնանկացավ, ինչին հետևեց դրա փլուզումը: Ըստ Վուդհիլի՝ որոշակի գործողությունների արդյունքում ոսկու գինը կնվազի 3.5 անգամ, նույնքան էլ նավթինը, ինչի հետևանքով Ռուսաստանը, Իրանը և Վենեսուելան կզրկվեն նավթադոլարների մոտ 57%-ից:
Վուդհիլը եզրափակում է, որ կայուն դոլարը ֆինանսական շուկաներում և տնտեսության մեջ ապահովում է կայունություն, ինչպես նաև հիմք է հանդիսանում արագ աճի, զբաղվածության ավելացման և բարգավաճման համար:
