Բուդապեշտում ընթացող Եվրոպայի քաղաքական ընկերակցության գագաթաժողովի շրջանակներում կայացել է Ֆրանսիայի և Թուրքիայի նախագահներ Էմանուել Մակրոնի և Ռեջեպ Թայիփ Էրդողանի հանդիպումը: Այդ մասին հայտնում է «Անադոլուն»՝ հղելով Թուրքիայի նախագահի աշխատակազմի մամուլի ծառայությանը:
Ըստ այդմ՝ նախագահները քննարկել են տարածաշրջանային և գլոբալ խնդիրներ, ինչպես նաև երկկողմ հարաբերությունները: Թուրքիայի նախագահն ասել է, որ երկու երկրների միջև կապերը հիմնված են խորը պատմության վրա, և առևտրատնտեսական հարաբերությունների խորացումը շահավետ կլինի երկու երկրների համար:
Էրդողանը վերստին հավաստիացրել է, որ Թուրքիայի ռազմավարական հեռանկարը Եվրամիությանն անդամակցությունն և գործընթացն ակտիվացնելու անհրաժեշտություն կա: Նա ուշադրություն է հրավիրել այն հանգամանքի վրա, որ Մաքսային միության նորացման և մուտքի ազատականացման վերաբերյալ տրված խոստումները պետք է կատարվեն:
Թուրքիայի նախագահն ընդգծել է, որ բոլոր երկրների շահերից բխում վերջ տալ Ռուսաստանի և Ուկրաինայի, Իսրայելի և Պաղեստինի, Իսրայելի և Լիբանանի միջև լարվածությանը՝ հիմք ընդունելով խաղաղությունը և դրան հասնելու դիվանագիտական միջոցները:
Մակրոն-Էրդողան հանդիպմանն անդրադարձ եղե՞լ է հայ-ադրբեջանական կարգավորմանը, Հարավային Կովկասում խաղաղության, կայունության և համագործակցության հեռանկարին: Թուրքիայի նախագահը Բուդապեշտ է մեկնել Բիշքեկից, որտեղ գումարվել է ՔՊԿ գագաթաժողով: Բաքվի իշխանական լրատվամիջոցի փոխանցմամբ՝ իր ելույթում նա ասել է, որ Հայաստանի և Ադրբեջանի միջև խաղաղությունը պետք է ամրագրի շեհիդների արյան գնով Ադրբեջանի ձեռք բերած նվաճումները:
Երևում է, ՔՊԿ գագաթնաժողովում հայ-ադրբեջանական կարգավորումը քննարկվել է: Նույն տեղում Բաքվի մեկնաբանը նկատել է տվել, որ Ղազախստանի նախագահ Տոկաևը Բիշքեկ է ժամանել Փարիզից և ընդգծել ֆրանս-ղազախական համատեղ կոմյունիկեն, որով կողմերն աջակցություն են հայտնում Հայաստանի և Ադրբեջանի միջև խաղաղության պայմանագրին՝ հիմք ընդունելով միմյանց տարածքային ամբողջականության ճանաչումն Ալմա-Աթայի հռչակագրի համաձայն:
Ըստ երևույթին՝ Ադրբեջանի նախագահ Իլհամ Ալիևը Մակրոն- Տոկաև համատեղ կոմյունիկեի այս դրույթի վերաբերյալ դժգոհություն է արտահայտել: Շատ հավանական է, որ Բուդապեշտում Էրդողանը Ֆրանսիայի նախագահի հետ շոշափել է նաև ֆրանս-ադրբեջանական հարաբերությունների կարգավորման հարցը:
Ղազախստանի հետ առևտրատնտեսական համաձայնությունների փաթեթը, որ ստորագրվել է նոյեմբերի 5-ին, ընդհանուր առմամբ ունի ավելի քան երկու միլիարդ եվրոյի արժեք: Նման ծավալի ներդրումների և ապրանքաշրջանառության լոգիստիկա է ընտրվել այսպես կոչված «միջին միջանցքը»: Փաստացի խոսքը Բաքու-Կարս երկաթուղու մասին է: Այստեղ առանց ֆրանս-ադրբեջանական համաձայնության՝ բարդություններն անխուսափելի կլինեն:
Հայ-ադրբեջանական ենթադրյալ պայմանագրի մասին Էրդողանի բիշքեկյան հայտարարությունը և Մակրոն-Տոկաև կոմյունիկեի համապատասխան ձևակերպումը, եթե նրբանկատորեն ձևակերպենք, նույնիմաստ չեն:
Ի՞նչ խնդիր է Ալիևի անունից Ֆրանսիայի նախագահին ներկայացրել Էրդողանը: Հնարավոր է՝ նա ստեղծված հնարավորությունն օգտագործում է՝ շահագրգիռ կողմերին հիշեցնելու, որ Հարավային Կովկասի հարցերն առանց իր ազդեցիկ մասնակցության լուծելու փորձերն անիմաստ են: Մյուս կողմից՝ որքանո՞վ է Ֆրանսիան հավատարիմ հռչակագրած դիրքորոշմանը կամ Էրդողանը Մակրոնի հետ բանակցություններն ինչպե՞ս է «մատուցելու» Պուտինին, որ արտգործնախարար Լավրովի անունից Հայաստանի և Ադրբեջանի միջև խաղաղությունը «վաղաժամ» է տեսնում: Բուդապեշտում կայացել է նաև Փաշինյան-Էրդողան հանդիպում:
