Իսպանիայի առաջնության 6-րդ տուրում «Ռեալ»-ն ու «Բարսելոնա»-ն խոշոր հաշվով հաղթանակներ տարան: Մոուրինյոյի սաները 6:2 հաշվով պարտության մատնեցին առաջնության նորեկ «Ռայո Վալեկանո»-ին: Չնայած խոշոր հաշվով հաղթանակին, մադրիդցիները լուրջ խնդիրներ ունեին պաշտպանությունում և նրանց առավելությունն այդքան էլ ակնհայտ չէր, որքան կարող է թվալ գրանցված վերջնական արդյունքից: «Արաքայական» ակումբի կազմում հեթ-տրիկի հեղինակ դարձավ Ռոնալդուն (39, 51, 84 ր.), ով ընթացիկ առաջնությունում իր խփած գոլերի թիվը հասցրեց 7-ի, մեկական անգամ էլ աչքի ընկան Իգուաինը (45 ր.), Վարանը (67 ր.) և Բենզեման (73 ր.), հյուրերի կազմում դուբլի հեղինակ դարձավ Միխուն:
Ի տարբերություն «Ռեալ»-ի, «Բարսելաոնա»-ի առավելությունը «Ատլետիկո Մադրիդ»-ի նկատմամբ ակնհայտ էր ու թեև կատալոնացիները 5 անպատասխան գնդակ ուղարկեցին մրցակցի դարպասը, հաշիվը կարող էր շատ ավելի խոշոր լինել: Գվարդիոլայի սաներից աչքի ընկան Վիլյան (9 ր.) և Մեսսին (26, 78, 90 ր.), հյուրերից ինքնագոլի հեղինակ դարձավ Միրանդան: Մեսսին ընթացիկ առաջնությունում խփեց իր 8-րդ գոլը և շարունակում է գլխավորել ռմբարկուների ցանկը:
Այս տուրի հանդիպումներից կարելի է առանձնացնել նաև «Սևիլիա»-ի տարած նվազագույն հաշվով հաղթնակը «Վալենսիա»-ի նկատմամբ: Հանդիպման 18-րդ րոպեին միակ գոլը խփեց Կանուտեն:
6-րդ տուրի մյուս խաղերում գրանցվեցին հետևյալ արդյունքները.
«Ատլետիկ Բիլբաո»-«Վիլյառեալ»` 1:1:
«Մալյորկա»-«Ռեալ Սոսյեդադ»` 2:1:
«Լևանտե»-«Էսպանյոլ»` 3:1:
«Գրանադա»-«Օսասունա»` 1:1:
«Սպորտինգ»-«Ռասինգ»` 0:0:
Մրցաշարային աղյուսակի միանձնյա առաջատար «Բետիս»-ը սեպտեմբերի 26-ին մրցակցի հարկի տակ ուժերը կչափի «Խետաֆե»-ի հետ:
