Երևանի Նոր Նորքի 2-րդ զանգվածի հանրակացարանի 4-րդ մասնաշենքի 1-ին հարկի բնակիչներին օրեր անց սպառնում է անօթևան մնալը և պարզապես փողոցում հայտնվելը: Բնակիչներից Արմինե Մխիթարյանը տեղեկացրեց, որ նախորդ օրը ԴԱՀԿ աշխատակիցներն այցելել են իրենց, չորս օր ժամանակ տվել, որպեսզի ազատեն տարածքը: ՀՀ կառավարության շենքի մոտ բողոքի ցույցի դուրս եկած քաղաքացիների հավաստմամբ` դրանք նկուղային հարկում գտնվող բնակելի տարածքներ են, իրենք այնտեղ են տեղափոխվել նախընտրական տարում, 2008 թ. ՀՀ Նախագահի ընտրություններից առաջ: «Մեզ ուզում են վտարել` ասելով, որ կառավարության որոշում է, կառավարությունն էլ ասում է, որ պետգույքի վարչության որոշումն է: Պետգույքի վարչությունն էլ իր հերթին պնդում է, որ դա կառավարության որոշումն է: Հիմա ու՞մ հավատանք, ու՞մ դիմենք»,- հարցնում է Արմինե Մխիթարյանը: Նա ասաց, որ այնտեղ ապրողները, որոնք հիմնականում սոցիալապես անապահով խավի ներկայացուցիչներ են` կենսաթոշակառուներ, հաշմանդամներ, անաշխատունակ մարդիկ, չունեին բնակարան: «Ընտրություններից առաջ պետք էր, որ այդ մարդիկ տեղավորվեին, տուն ունենային, դրա համար տվեցին, հիմա էլ ուզում են դուրս անել օրենքի սահմաններում»,-նշեց մեր զրուցակիցը: Հանրակացարանի բնակիչը հիշեցրեց, որ իրենց այդ բնակելի տարածքները հատկացվել են թաղապետ Դավիթ Պետրոսյանի օրոք: «Եթե մեզ պետք է դուրս անեին, ինչու՞ էին մեզ գրանցում այնտեղ: Մենք պարտաճանաչ վճարել ենք բոլոր կոմունալ ծախսերը, իսկ հիմա մեզ չորս օր են տրամադրել, որ դուրս գանք»,- ասում է հանրակացարանի բնակիչը: ՀՀ կառավարության դիմումների և նամակների բաժնի պետ Ալեքսանդր Ղազարյանն էլ «Առաջին լրատվական»-ի հարցին ի պատասխան արձագանքեց, որ մարդիկ ապօրինի են մտել և այնտեղ բնակություն հաստատել: Սակայն այդպես էլ նա չկարողացավ բացատրել, թե ինչպես են բնակիչները ապօրինի մուտք գործել և զբաղեցրել այդ տարածքը: