Ադրբեջանական 1news.az-ի փոխանցմամբ՝ ադրբեջանական պատվիրակությունը, Ադրբեջանի Գիտությունների ազգային ակադեմիայի նախագահ Մահմուդ Քերիմովի գլխավորությամբ, մեկնել է Վիեննա, որտեղ սեպտեմբերի 19-23-ը տեղի է ունենում Ատոմային էներգիայի միջազգային գործակալության (ԱԷՄԳ, МАГАТЭ) 55-րդ նիստը։
Նիստում Քերիմովը կտրուկ դեմ է արտահայտվել Մեծամորի ատոմակայանի աշխատանքների շարունակմանը. «Մեծամորի ատոմակայանի գործունեությունը «սպառնում» է ողջ տարածաշրջանին։ Դրա համար էլ «անհրաժեշտ» է դադարեցնել այդ կայանի աշխատանքը։ Չնայած նրան, որ միջազգային փորձագետները բազմիցս հետազոտություններ են իրականացրել ՀԱԷԿ-ում, դիտարկման արդյունքները չեն հաղորդվել Հայաստանին սահմանակից երկրներին։
Թուրքիան, Ադրբեջանը և Վրաստանը մեկ անգամ չէ, որ առաջարկել են միջազգային փորձագետների մասնակցությամբ համատեղ դիտարկում անցկացնել Մեծամորի ատոմակայանում՝ պարզելու համար նրա գործունեության անվտանգության աստիճանը, սակայն Հայաստանն ու միջազգային կառույցները չեն աջակցել այդ նախաձեռնությանը։
Դրա հետ կապված՝ ես պահանջում եմ, որ վերջապես Մեծամորի ատոմակայանի գործունեության մասին լիարժեք տեղեկատվություն տրամադրվի Հայաստանի հարևան երկրներին։ Այդ ժամանակ էլ կարելի կլինի օբյեկտիվորեն գնահատել մարդկանց ու բնապահպանության համար Հայաստանում գործող այդ կայանից բխող սպառնալիքի մակարդակը»։
Հիշեցնենք, որ այս տարվա հուլիսի սկզբին էլ Ադրբեջանը Մեծամորի ատոմակայանի փակման հարցը բարձրացրել էր Բելգրադում տեղի ունեցած ԵԱՀԿ Խորհրդարանական վեհաժողովի 20-րդ նիստի ժամանակ՝ ԵԱՀԿ անդամ երկրներին կոչ անելով դադարեցնել կայանի գործունեությունը, որից «ամեն րոպե վտանգ է բխում» տարածաշրջանի համար:
