Հայ ազգային կոնգրեսի համակարգող Լևոն Զուրաբյանը օրերս լրագրողների հետ հանդիպմանը հայտարարել էր, թե իշխանության հետ երկխոսությունը այլևս երկիրը ստեղծված իրավիճակից դուրս բերելու գործիք չեն համարում: Ի՞նչ է սա նշանակում՝ հարցրեցինք «Հանրապետություն» կուսակցության առաջնորդ Արամ Սարգսյանին:
«Հանրապետություն» կուսակցության առաջնորդը նշեց, որ Հայ ազգային կոնգրեսի համակարգողի նշյալ հայտարարությունը շատ պարզ է և լրացուցիչ մեկնաբանությունների կարիք չկա:
Օրերս «168 ժամ» թերթին տված հարցազրույցում Հայաստանի նախկին ԱԳ նախարար Վարդան Օսկանյանն անդրադառնալով ակտիվ քաղաքականություն` Ռոբերտ Քոչարյանի վերադարձի, ընտրություններին ինչ-որ կերպ մասնակցելու հավանականության մասին հարցին՝ պատասխանել էր. «Դրանք իմ ենթադրություններն են եղել: Ես Ռ.Քոչարյանի հետ ոչ մի բան չեմ պայմանավորվել: Նա ինձ որևէ բան չի ասել իր անելիքների մասին: Իմ ենթադրությունն այն է, որ Քոչարյանը վերջիվերջո քաղաքական ներգրավվածություն ունենալու է: Նախ` խորհրդարանական ընտրություններն են: Այնտեղ, ես կարծում եմ, որ ինչ-որ դրսևորում կլինի»:
«Հանրապետություն» կուսակցության առաջնորդ Արամ Սարգսյանին «Առաջին լրատվականը» հարց ուղղեց, թե Ռ.Քոչարյանի հնարավոր վերադարձի ի՞նչ հնարավորություն է նա տեսնում և ո՞ր կուսակցություններն ու գործիչները կարող են որպես հենարան ծառայել նրա հնարավոր վերադարձին:
«Ընդհանրապես չեղած բանի մասին ես տեսակետներ չեմ հայտնում: Այսօրվա դրությամբ ես Ռոբերտ Քոչարյանի քաղաքական գործունեությունը համարում եմ չեղած բան: Այն, ինչ որ Վարդան Օսկանյանն է ասում, դա չի նշանակում, որ Ռոբերտ Քոչարյանն է: Երբ որ Ռոբերտ Քոչարյանը կասի` Քոչարյանին էլ կպատասխանենք: Իսկ Վարդան Օսկանյանը թող իր փոխարեն խոսի, իր տեսակետներն ասի»,- նկատեց Արամ Սարգսյանը:
