Եգիպտոսի, Կատարի եւ ԱՄՆ ղեկավարները տարածել են համատեղ հայտարարություն, որով կոչ են անում Իսրայելին ու ՀԱՄԱՍ-ին գալ կրակի դադարեցման շուրջ համաձայնության, վերադառնալ այն բանակացությանը, որն ընդհատվել էր Թեհրանում ՀԱՄԱՍ-ի քաղբյուրոյի առաջնորդի սպանությամբ: Ինչպես հայտնի է, սպանված Հանիային փոխարինել է ընտրվել Յահյա Սինվարը: Նա իր մոտեցումներով միշտ եղել է առավել արմատական, քան Հանիան: Դա կօգնի՞ վերադառնալ այն բանակցությանը, որը սկսել էր Հանիայի պաշտոնավարման ժամանակ եւ ընդհատվել նրա սպանությամբ: Առավել արմատական առաջնորդը կարո՞ղ է կայացնել բանակցելու լեգիտիմ որոշում: Չէ՞ որ դա կպարունակի ռեպուտացիոն ռիսկ: Միեւնույն ժամանակ, հակառակն էլ պարունակելու է էսկալացիայի ռիսկ, ինչը ձեռնտու չէ համատեղ հայտարարության երեք երկրներին, եւ իհարկե ոչ միայն նրանց:
Ավելին, էսկալացիայի ռիսկը ձեռնտու է միայն Իսրայելի վարչապետ Նաթանյահուին եւ նրա իշխանությանը: Այդ ռիսկը ձեռնտու չէ նաեւ Իրանին, բայց Իրանը ըստ էության հայտնվել է առնվազն որեւէ պատասխանի պարտադրվածության առաջ: Բոլորը կոչ են անում Թեհրանին լինել զսպված: Բայց, արդյո՞ք զսպվածության աստիճանը կախված է նրանից, թե ինչ հաջողության կհասնեն Գազայում կրակի դադարեցման շուրջ բանակցությունը վերականգնելու եւ մոտ ապագայում կոնկրետ արդյունք ապահովելու գործում ԱՄՆ, Կատարն ու Եգիպտոսը: Այդ ֆոնին ուշագրավ է մի տեղեկություն, որը մնաց հիմնականում մեծ ստվերում: Քուվեյթում լույս տեսնող Ալ Ջարիդա պարբերականը հրապարակել էր տեղեկություն՝ հղում անելով իրանյան իր աղբյուրներին, որ Հանիայի սպանությունից օրեր անց Իրանում, Թեհրանից ոչ հեռու տեղի է ունեցել իրան-ամերիկյան հանդիպում:
Թերթի տվյալով, ամերիկյան դիվաագիտական պատվիրակությունը Իրան է ժամանել Թուրքիայից՝ մասնավոր ուղղաթիռով, իսկ բանակցությունը տեղի է ունեցեկլ Հեղափոխության պահապանների կորպուսի պահպանության ներքո: Հաղորդվում է, որ ամերիկյան պատվիրակության այցը կայացել է Օմանի միջնորդությամբ: Այդ տեղեկությունը չի հերքել թե պաշտոնական Թեհրանը, թե Վաշինգտոնը: Ըստ Քուվեյթի պարբերականի, ԱՄՆ պատվիրակները հավաստիացրել են Իրանին, որ ԱՄՆ տեղյակ չի եղել ՀԱՄԱՍ-ի առաջնորդի սպանության ծրագրման մասին, նաեւ հորդորել Իրանին «չխաղալ Նաթանյահուի խաղն» ու չանել քայլեր, որոնք կբերեն ռեգիոնը մեծ պատերազմի:
Կատարի, Եգիպտոսի, ԱՄՆ ղեկավարների համատեղ հայտարարությունն այդ տեղեկության ֆոնին թողնում է տպավորություն, որ Իրանի «պայմանն» է՝ Գազայյում հրադադարի հասնելը, որպես Հանիայի սպանությանը տրվելիք պատասխանի զսպվածության գրավական: Սա իհարկե ենթադրություն է, սակայն երեք երկրների ղեկավարների բարձր մակարդակով արված հայտարարությունն իհարկե պարզապես հերթական դիվանագիտական հռետորաբանություն չէ: Այդ մակարդակում համատեղ հայտարարություններն ունենում են էական մոտիվներ:
