Եգիպտոսը Հայաստանի վստահելի գործընկերն է իսլամական աշխարհի հետ հարաբերություններում, Կահիրեյում հայտարարել էր Հայաստանի վարչապետ Նիկոլ Փաշինյանը, որը մարտի 5-ին այց է կատարել Եգիպտոսեւ հանդիպել այդ երկրի նախագահի հետ: Մի կողմից, Եգիպտոսն անշուշտ՝ իսլամական աշխարհի հետ արդյունավետ, կայուն փոխհարաբերության հարցում Հայաստանի համար կարեւոր օղակներից մեկն է: Մյուս կողմից, Նիկոլ Փաշշինյանն այդ արձանագրումն անում է բավականին ուշագրավ մի ժամանակահատվածում: Եգիպտոսում տեղի է ունեցել նաեւ Հայաստանի ու Եգիպտոսի արտգործնախարարների հանդիպում: Դա թերեւս տեղի է ունեցել Եգիպտոսի արտգործնախարարի՝ Ջիդդա մեկնումից առաջ:
Սաուդական քաղաքում, որն Իսլամական գործակցության կազմակերպության կենտրոնակայանն է, կայանալու է կազմակերպության անդամ երկրների արտգործնախարարների արտահերթ հավաք՝ Գազայի իրավիճակի քննարկման համար: Ինչպես հայտնի է, իրավիճակը Գազայում ոչ միայն բարդ է, այլ նաեւ ունի լարվածության նոր ալիքի մեծ ռիսկ, եթե Իսրայելը հավատարիմ մնա իր հայտարարությանն ու ռազմական գործողություն սկսի Եգիպտոսի հետ սահմանին գտնվող Ռաֆֆաթ քաղաքի նկատմամբ: Այդ քաղաքում է կենտրոնացած Գազայյի հյուիսիսց տեղահանված բնակչության մեծ մասը, ըստ տարբեր տվյալների՝ ներկայումս Ռաֆֆաթում է Գազայի բնակչության երկու երրորդը:
Շաբաթներ առաջ իսրայելական մամուլը հղում անելով դիվանագիտական աղբյուրներին գրեց, որ Եգիպտոսը զգուշացրել է՝ եթե ռազմական գործողություններ սկսեն սահմանին, ապա Կահիրեն կարող է ընդհուպ դադարեցնել Իսրայելի հետ խաղաղության պայմանագրի գործողությունը: Կասկածից վեր է, որ Իսլամական գործակցության կազմակերպության արտգործնախարարների արտահերթ հավաքը քննարկելու է ռեգիոնի համար կարեւորագույն հարցեր: Այդ ֆոնին ուշադրության է արժանի այն, որ արտգործնախարարների հավաքին ընդառաջ երկկողմ հանդիպումների շարքում նախօրեին տեղի է ունեցել Իրանի եւ Ադրբեջանի արտգործնախարարների հանդիպում: Իրանական Իրնա գործակալության փոխանցմամբ, Իրանի արտգործնախարարը հայտարարել է, որ Ադրբեջանը կարեւոր տեղ ունի Իրանի հարեւանության քաղաքականության շրջանակում:
Աբդոլահիանը հայտարարել է, որ բացվում է երկու երկրների եւ ժողովուրդների գործակցության նոր էջ: Նա հայտնել է նաեւ երկկողմ միջկառավարական հանձնաժողովի նիստը Թեհրանում հյուրընկալելու պատրաստակամություն: Իրանն ըստ ամենայնի մերձավորարեւելյան իրադարձությունների թեժացման, լարվածության աճի միտումների ֆոնին ձգտում է Ադրբեջանի հետ այնպիսի երկխոսության, որը առավելագույնս կապահովագրի Թեհրանին հյուսիսային սահմանների մոտ ապակայունացման ռիսկերից, ռազմավարական մարտահրավերներից: Իսրայելը, որի համար Ադրբեջանի հետ սերտ գործակցությունը մշտապես դիտարկվել է հենց անհրաժեշտ պահին ռեգիոնալ ապակայունացմամբ Իրանի համար լրջագույն մարտահրավեր ստեղծելու միջոց, ներկայումս անկասկած կարող է դիտարկել այդ միջոցը գործի դնելու հնարավորությունն ու անհրաժեշտությունը:
Առավել եւս, որ լայն իմաստով Թել Ավիվը կարող է այդ հարցում ունենալ այլ աջակիցներ: Այդ իմաստով, հնարավոր է ենթադրել, որ Իրանի համար Ջիդդայում տեղի ունենալիք արտգործնախարարների արտահերթ հավաքը ունի նշանակություն նաեւ Կովկասի հարցում հավաստիացումներ ստանալու տեսանկյունից, ինչը անկասկած կարեւոր հանգամանք է նաեւ Հայաստանի համար: Ըստ ամենայնի, Փաշինյանի հայտարարությունը վկայում է, որ Երեւանը Եգիպտոսից ակնկալում է Ջիդդայում աջակցություն այդ օրակարգին:
