Պաղեստինի ինքնավարության առաջնորդ Մահմուդ Աբասը օրերս հայտարարել է, որ ամեն ինչ կանի, որպեսզի Պաղեստինը դառնա ՄԱԿ-ի լիիրավ անդամ և հռչակվի անկախ պետություն:
Թե ինչպիսին կլինի հայերի դիրքորոշումը Պաղեստինի անկախացման դեպքում, «Առաջին լրատվականը» փորձեց պարզել Երուսաղեմի պատրիարքության միաբան Արիս արքեպիսկոպոս Շիրվանյանից:
«Մենք` հայերս, իհարկե փոքրամասնություն ենք այս սուրբ երկրի մեջ, բայց մեր պատվիրակությունը իր կարևոր նշանակությունն ունի որպես սրբավայրերի տերերից մեկը, այդ իմաստով էլ նկատի է առնվում մեր դիրքը: Պաղեստինի ինքնավար կառավարությունը ամսի 23-ին ՄԱԿ-ի ընդհանուր ժողովին իր դիմումը պետք է ներկայացնի, որ ազգերը Պաղեստինի պետությունը ճանաչեն»:
Մեր հարցին, թե ի՞նչ են ակնկալում հայերը Պաղեստինի անկախացումից՝ պատասխանեց. «Մենք` որպես Երուսաղեմի հին քաղաքի բազամադարյան բնակիչներ, իհարկե ակնկալում ենք, որ Պաղեստինի ապագա մայրաքաղաքի մեջ կշարունակենք ապրել որպես Քրիստոսի սրբավայրերի պահապաններից մեկը: Թեև քաղաքական կետերում մենք ուժ չունենք, բայց որպես հին քաղաքի բնակիչ մեր կարևոր դերն ունենք: Եվ հայկական տարածքներ, իհարկե, ունենք թե՛ հին քաղաքի մեջ, թե՛ հին քաղաքից դուրս, նաև Պաղեստինի հատվածում, և կարծում եմ` տարածքները կմնան որպես տարածք յուրաքանչյուր պետության սահմանի մեջ: Պաղեստինի պետությունը, կարծում եմ՝ նաև Իսրայելը, հարգում են մեր իրավունքները»:
