News Georgia-ի փոխանցմամբ՝ երեկ Վրաստանի և Հայաստանի արտաքին քաղաքական գերատեսչությունների միջև Վրաստանի ԱԳՆ-ում տեղի է ունեցել երկկողմանի քաղաքական խորհրդատվությունների առաջին փուլը։
Այն անցկացվել է երկու երկրների ԱԳՆ-ների դեպարտամենտների ղեկավարների մակարդակով։ Վրացական կողմից մասնակցել են եվրոպական գործերի, միջազգային կազմակերպությունների, եվրաինտեգրման, միջազգային տնտեսական, մշակութային և հումանիտար հարաբերությունների և իրավական դեպարտամենտները։
Վրաստանի ԱԳՆ-ի տարածած հաղորդագրության մեջ նշված է. «Խորհրդատվությունների շրջանակներում քննարկվել են քաղաքական, տնտեսական և մշակութային, ինչպես նաև իրավական ոլորտներում Վրաստանի ու Հայաստանի միջև գոյություն ունեցող համագործակցության հարցը։
Կողմերը հատուկ ուշադրություն են հրավիրել ԵՄ-ի և այլ միջազգային կազմակերպությունների հետ հարաբերությունների վրա։ Կողմերն ընդգծել են երկկողմանի հարաբերությունների հետագա խորացման անհրաժեշտությունը»։