Օրերս Տնտեսական մրցակցության պաշտպանության հանձնաժողովը «ԱրմենՏել» ընկերության հանդեպ «Յուքոմ» ընկերության բողոքի հիման վրա հարուցված վարչական վարույթի արդյունքներով խիստ նախազգուշացում տվեց «ԱրմենՏել»-ին, որը չարաշահել էր գերիշխող դիրքը և բարձր գին սահմանել իր բջջային ցանցից դեպի «Յուքոմ» ընկերության ֆիքսված ցանց կատարվող զանգերի համար:
«Առաջին լրատվականի» հետ զրույցում «ԱրմենՏել»-ի գլխավոր տնօրեն Իգոր Կլիմկոն Հանձնաժողովի որոշումը «լիովին ճիշտ» որակեց. «Իմ կարծիքով՝ դա կշռադատված որոշում է, որովհետև ամեն ինչ հարթ չէ իրավական տեսակետից»:
Ի.Կլիմկոն նկատեց, որ տարբեր ԶԼՄ-ներ սխալ էին լուսաբանել Հանձնաժողովի այդ օրվա նիստը՝ տարածելով, թե «ԱրմենՏելը» տուգանվել է: Ընկերության ղեկավարը պարզաբանեց, որ «Յուքոմ»-ի բողոքի հիման վրա տուգանք չի եղել, միայն նախազգուշացում է արվել «ԱրմենՏել»-ին՝ որպես բջջային կապի ոլորտում գերիշխող դիրք ունեցողի. «Այն 100 մլն դրամի վերաբերյալ պետք է հասկանալ, որ դա ավարտն է որոշ տարաձայնությունների, գործընթացների, որոնք շարունակվում էին դեռ 2008թ.-ի գործերի հիման վրա: Դեռ Հանձնաժողովի նախկին կազմն էր 2008-ին «ԱրենՏել»-ին տուգանել այս կամ այն խախտումների համար: Այդ 100 մլն-ը վերաբերում է եռամյա հնության գործերին, Հանձնաժողովը հարկ համարեց ԶԼՄ-ներին հայտարարել, որ այդ գործերը փակված են, սակայն դրանք ոչ մի ուղիղ կապ չունեին վերջին լսումների հետ»:
Ի.Կլիմկոն հայտարարեց, որ ժամանակն է «վերբեռնել» «ԱրմենՏել»-ի հանդեպ վերաբերմունքը, ժամանակն է դադարել «ԱրմենՏել»-ին ընկալել որպես հեռահաղորդակցային շուկայում սպառնալիք, որն իր մենաշնորհային դիրքով ճնշում է փոքրիկ, խեղճ փրովայդերներին. «Վերջ: Մոռացեք դա: Դա արդեն վաղուց չկա: Հակառակը, մենք աջակցում ենք այդ փրովայդերներին և անում ենք ամեն-ինչ, որպեսզի իրականում նորմալ մրցակցություն լինի: Մենք շատ կառուցողական ենք վերաբերվում նրանց: Իրական մրցակցությունն այն է, ինչը շուկան առաջ է մղում: Այսօր հեռահաղորդակցության ոլորտում ընթացող պրոցեսները`կլանումներ, նոր օպերատորների հայտնվել, խոսում է այն մասին, որ շուկան հասել է որոշակի հասունության: Մենք նպաստում ենք, որ այդ շուկան առավելապես առողջանա: Կլանումները դրական և ճիշտ երևույթ են: Փոքր փրովայդերներին դժվար է մրցակցել մեզ նման հսկայի հետ, և նրանք պետք է միավորվեն, ու մեզ էլ հետաքրքիր կլինի, երբ նորմալ մրցակիցներ կունենանք»:
«Յուքոմ» ընկերության կոմերցիոն տնօրեն Արամ Բարսեղյանը մեզ հետ զրույցում հավաստեց, որ «ԱրմենՏել»-ը մինչև Հանձնաժողովի որոշումն արդեն փոխել էր սակագները. ««Յուքոմ»-ի ու «ԱրմենՏել»-ի հարաբերությունները զուտ գործնական են: Հարցը լուծվեց, ու այժմ ոչ մի խնդիր չունենք»:
