Թուրքական Milliyet թերթի փոխանցմամբ՝ երեկ երեկոյան Ստամբուլի Ջեմալ Ռեշիթ Ռեյ համերգային դահլիճում տեղի է ունեցել «Հրանտ Դինք» միջազգային մրցանակաբաշխությունը, որը կազմակերպել է «Հրանտ Դինք» հիմնադրամը։ Ի դեպ, երեկ Ստամբուլի հայկական «Ակօս» թերթի նախկին խմբագրապետ Հրանտ Դինքը պետք է դառնար 57 տարեկան։
Այս մրցանակաբաշխությունն անցկացվում է 3-րդ անգամ, ամեն անգամ մրցանակը հանձնվում է երկու հոգու, որոնցից մեկը ներկայացնում է Թուրքիան, իսկ մյուսը՝ արտերկիրը։ Թեկնածուներ կարող են լինեն այն անձինք, ովքեր պայքարում են խտրականության, ռասիզմի և բռնության դեմ՝ վտանգի ենթարկելով իրենց կյանքը։ Այն կարող է հանձնվել ինչպես անհատի, այնպես էլ խմբի։
Ի դեպ, այս տարի թեկնածուների թվում էր ընդգրկվել նաև «Հայկական ժամանակ» օրաթերթի գլխավոր խմբագիր Նիկոլ Փաշինյանը, որի թեկնածությունն առաջադրել էր «Անկախ լրագրողների ցանց» հասարակական կազմակերպությունը:
Այս տարի «Հրանտ Դինք» միջազգային մրցանակի դափնեկիրներ են դարձել թուրք լրագրող Ահմեթ Ալթանը և մեքսիկացի ֆեմինիստ ու մարդու իրավունքների պաշտպան Լիդիա Կաչոն։ Ժյուրիի կազմում են գտնվել նաև Հրանտ Դինքի կինը՝ Ռաքել Դինքը և Բորիս Նավասարդյանը։
Հիշեցնենք, որ 2009 թվականին «Հրանտ Դինք» միջազգային մրցանակի դափնեկիրներ են դարձել թուրքական Taraf թերթի լրագրող Ալփեր Գյորմուշը և իսրայելցի լրագրող, հրապարակախոս Ամիրա Հասը, իսկ 2010 թվականին իսպանացի դատավոր Բալտասար Գարզուն Ռեալը և «Թուրքիայի խղճով մերժում» շարժումը։
