Վրաստանի խորհրդարանը օրերս առաջին ընթերցմամբ միաձայն ընդունեց «Պետական գույքի մասին» օրենքում փոփոխությունների փաթեթը, ինչը ենթադրում է պետական ընկերությունների բաժնեմասերի 15-25 տոկոսի տեղաբաշխում միջազգային բորսաներում: Նշենք, որ Ռուսաստան-Վրաստան-Հայաստան գազատարը ևս պատկանում է նման ընկերությունների շարքին:
Վրացի քաղաքագետ Տորնիկե Շարաշենիձեն, պատասխանելով «Առաջին լրատվականի» հարցին, թե հնարավո՞ր է, որ Ռուսաստանը գնի վրացական պետական օբյեկտների բաժնետոմսեր, մասնավորապես վերը նշված գազատարը, նկատեց, որ Ռուսաստանն անկասկած հետաքրքրություն կունենա վրացական ստրատեգիական կարևորություն ներկայացնող օբյեկտների, մասնավորապես Հայաստան մտնող գազատարի նկատմամբ և իհարկե հնարավորություն կունենա բաժնետոմսեր գնելու, քանզի վրացական տնտեսությունը ազատական է և բաց է անգամ ռուսական ներդրումների համար. «Բայց կարևոր է, որ բաժնետոմսերի կենտրոնական փաթեթը չի վաճառվում և պետության ձեռքում է մնում, քանզի մենք շատ լավ հասկանում ենք, որ դա կլինի Ռուսաստանի համար ճնշման գործիք Վրաստանի, ինչու ոչ՝ նաև Հայաստանի վրա: Ճիշտ է, այսօր Հայաստանը Ռուսաստանի գործընկերն է, բայց ով գիտի, թե վաղն ինչ կլինի, այդ իսկ պատճառով չի կարելի որևէ մեկին տալ այդ գազատարը»:
Շարաշենիձեն նաև հավելեց, որ այս օրենքի ընդունումը Ռուսաստանին ամենևին էլ հնարավորություն չի տա մեծացնել իր քաղաքական ազդեցությունը Վրաստանում: Նա նկատեց, որ Ռուսաստանը վաղուց իր «յուղոտ» ներկայությունն ունի վրացական տնտեսությունում, սակայն դա չխանգարեց վերջինիս պատերազմ սկսել Վրաստանի դեմ:
