Բանակում անպատժելիության մթնոլորտ չկա: Այսօր ՀՀ ՊՆ Սեյրան Օհանյանը, ՀՀ կառավարության շենքի առջև, հանդիպելով բանակում զոհվածների ծնողներին, նման հայտարարություն է արել` հավելելով, որ չկա որևէ դեպք, որ մեղավորների շրջանակը հայտնաբերված չլինի կամ մեղավոր մարդիկ հայտնաբերված և կալանավորված չլինեն:
«Բանակում բոլոր դեպքերի մեղավորները իրավական հարթության վրա պատիժ են ստանում, կարգապահական տույժեր` սկսած պաշտոններից ազատելուց, այլ պաշտոններ տեղափոխելուց մինչև բանակից զորացրում»,- ասաց ՀՀ Պնախարարը: Նա խորհուրդ տվեց սպանված երիտասարդների ծնողներին համբերությամբ լցվել և սպասել մինչ գործերը կբացահայտվեն:
«Մենք` բոլորս, այդ ցավը միասին ապրելով, այդ ողբերգության ազդեցությունը միասին տանելով, մի քիչ համբերություն պետք է ունենանք, որ հետևենք, որ իրավապահները գործերը հասցնեն ավարտին»,- ասաց Սեյրան Օհանյանը: Սպանված երիտասարդների ծնողների այն հարցին, թե ինչու են 1500 երիտասարդ մահացել մինչ օրս, նախարարը չհամաձայնեց` ընդգծելով, որ բանակային անօրինականությունների թիվը նվազել է: Նախարարը պատասխանեց նաև բանակում սպանված, բայց ինքնասպանություն որակված Արտակ Նազարյանի մոր հարցերին` նշելով, որ ՀՀ պաշտպանության փոխնախարարը և զինդատախազը հետևում են գործի ընթացքին: Նա նաև ասաց, որ փաստաթուղթ է ստորագրվել, որպեսզի Արտակ Նազարյանի դեպքի դատավարությունը տեղափոխվի Երևան:
