Հայաստանում դավանանքի ազատությունը վտանգված է: Այսօր «Առաջին լրատվական»-ի հետ զրույցում նման մտավախություն հայտնեց իրավապաշտպան Միքայել Դանիելյանը` խոսելով ԱՄՆ պետդեպի զեկույցի մասին: Նշենք, որ զեկույցում ԱՄՆ արտաքին գերատեսչության ղեկավար Հիլարի Քլինթոնն անդրադարձել է նաև Հայաստանում դավանանքի ազատության մասին օրենքի ոտնահարումներին մի շարք օրինակներով: Զեկույցում նաև ասվում է, որ թեև Հայաստանի Սահմանադրությունում ամրագրված է դավանանքի ազատության սկզբունքը, սակայն քաղաքականությունն ու այլ օրենքները որոշակի սահմանափակումներ են մտցնում կրոնական փոքրամասնությունների դավանանքի ազատության հարցում:
«Ես կարող եմ ասել, որ համաձայն եմ այն ամենի հետ, ինչ ասված է ԱՄՆ պետդեպի զեկույցում, և նույնիսկ կարող եմ մատնանշել մի քանի օրենքներ, որոնք սահմանափակում են դավանանքի ազատության մասին օրենքը»,- ասաց Մ. Դանիելյանը` նշելով այլընտրանքային ծառայության մասին օրենքը, որը, ըստ նրա, չի համապատասխանում միջազգային նորմերին: Նա նաև խոսեց իրականացվելիք փոփոխության մասին, որը ամենակոպիտ խախտում համարեց դավանանքի ազատության մասին օրենքում: «Ամենավերջին փաստը, որ կարող եմ նշել, այն է, որ պետք է փոփոխություն լինի դավանանքի ազատության օրենքում: Հայաստանում վտանգի տակ է խղճի ազատությունը: Այդ փոփոխության համաձայն` սահմանափակվելու է այն անձանց գործունեությունը, որոնք հոգեորսությամբ են զբաղվում. 4-7 տարի ազատազրկում: Սա արդեն իսկ մարդու իրավունքների կոպիտ ոտնահարում է»,- մեկնաբանեց իրավապաշտպանը` ասելով, թե սա խոսում է այն մասին, որ ՀՀ իշխանությունները ամեն քայլ ձեռնարկում են դավանանքի ազատության հարցում ճնշումները ուժեղացնելու համար: Մեր հարցին, թե միջազգային օրենքով սահմանված ազատությունները ինչո՞ւ չեն պահպանվում Հայաստանում, Մ. Դանիելյանը պատասխանեց, որ ՀՀ իշխանությունները դեմոկրատական չեն և շատ հեռու են լիբերալիզմից ու հանդուրժողականությունից:
