Նիգերի պաշտպանության նախարարությունը հայտնել է, որ առնվազն 17 նիգերցի զինվորական է զոհվել Մալիի հետ սահմանի մոտ տեղի ունեցած հարձակման հետևանքով: Այս մասին հաղորդում է Al Jazeera-ն։
«Բանակային ստորաբաժանումը դարանի մեջ է հայտնվել Կուտուգու քաղաքի մոտ», – ասվում է գերատեսչության հայտարարության մեջ։
Գերատեսչությունը հավելում է, որ ևս 20 զինվոր վիրավորվել է, որոնցից 6-ը ծանր վիճակում են։
Դրա հետ մեկտեղ զինվորականները հայտարարել են, որ կարողացել են «չեզոքացնել» ավելի քան հարյուր հարձակվողների, երբ նրանք սկսել են նահանջել:
Al Jazeera-ն հիշեցնում է, որ այն տարածաշրջանը, որտեղ հատվում են Նիգերի, Մալիի և Բուրկինա Ֆասոյի սահմանները, հաճախ դառնում է «Իսլամական պետություն» կամ «Ալ-Քաիդա» ահաբեկչական խմբավորումների հետ կապ ունեցող զինված խմբերի հարձակումների էպիկենտրոնը։
Մինևնույն ժամանակ Նիգերում իշխանությունը զավթած զինվորականները պատրաստվում են սահմանակից պետությունների կողմից հնարավոր ռազմական գործողությունների։ Associated Press գործակալությունը նշում է, որ մայրաքաղաք Նիամեյի բնակիչները կոչ են անում կամավորներին՝ օգնել բանակին Արևմտյան Աֆրիկայի երկրների տնտեսական համայնքի անդամ պետությունների հավանական միջամտության դեմ պայքարում։
