Իսպանիայի առաջնության 3-րդ տուրում երկրի գործող չեմպիոն «Բարսելոնա»-ն մրցակցի հարկի տակ չկարողացավ հաղթել «Ռեալ Սոսյեդադ»-ին և ընթացիկ մրցաշրջանում առաջին միավորները կորցրեց:
Այն, ինչ հաջողվեց կատարել «Սոսյեդադ»-ի ֆուտբոլիստներին, իսկապես հարգանքի է արժանի. դժվար է հիշել` ե՞րբ է վերջին անգամ «Բարսելոնա»-ն ձեռքից բաց թողել երկու գնդակի առավելությունը:
Հանդիպման 10-րդ րոպեին Չավին առաջ մղեց կատալոնացիներին, 1 րոպե անց Ֆաբրեգասը հաշիվը դարձրեց 0:2: Առաջին խաղակեսում «Բարսելոնա»-ն կարող էր ևս երկու անգամ աչքի ընկնել, սակայն Գվարդիոլայի սաները չիրացրին իրենց հնարավորությունները: Եվ այս ամենն առանց Մեսսիի, Վիլյայի, Ինիեստայի, Պիկեի և Պույոլի:
Երկրորդ խաղակեսը նույնպես սկսվեց «Բարսա»-ի գրոհներով, սակայն շուտով «Սոսյեդադ»-ին հաջողվեց ոչ միայն կրճատել հաշվի տարբերությունը, այլև հավասարեցնել այն: 59-րդ րոպեին աչքի ընկավ Ագիրեչեն, 4 րոպե անց` Գրիզմանը:
Գվարդիոլան անմիջապես խաղադաշտ նետեց նախ Մեսսիին, ապա` Ինիեստային: Թվում էր կատալոնացիները վերջին կես ժամում կուժեղացնեն ճնշումը մրցակցի դարպասին, սակայն հակառակ սպասումների` «Սոսյեդադ»-ն ավելի մոտ էր հաղթական գոլը խփելուն: Ինչևէ, նոր գոլեր չգրանցվեցին: «Ռեալ Սոսյեդադ»-«Բարսելոնա»` 2:2:
«Բարսելոնա»-ի միավորների կորստից ամենաշատն, իհարկե, «Ռեալ»-ը կուրախանա, որն այս պահին «Սանտիագո Բերնաբեու» մարզադաշտում ընդունել է «Խետաֆե»-ին և հաղթանակի դեպքում 2 միավորով առաջ կանցնի գլխավոր մրցակցից:
