Հայկական կինոպատմության մեջ առաջին անգամ 2012 թ. փետրվարին կանցկացվի Ազգային կինոյի մրցանակաբաշխություն: Այս մասին լրագրողերի հետ հանդիպանն ասաց Ազգային կինոկենտրոնի նախագահ Գևորգ Գևորգյանը:
«Այսօր կինոն որոշակիորեն վերելք է ապրում, ու այն մտավախությունը, թե հայ կինո չկա, այն չի ցուցադրվում, սկսում է ի չիք դառնալ»,- ասաց Գևորգյանը
Նրա խոսքով` այդ ծրագիրն իրականացնելը մեկ քայլ է՝ հայ հանդիսատեսին հայ կինոն հասանելի դարձնելը։ Նա կարևորեց այդ նախաձեռնությունն այն իմաստով, որ դա հնարավորություն է տալիս կինոասպարեզի շատ ոլորտների հետաքրքրությունն արթնացնել։ Լինելու է լավագույն կինոռեժիսոր, լավագույն կինոօպերատոր և լավագույն կոմպոզիտոր անվանագկարգեր։
Գևորգյանը տեղեկացրեց, որ պետական ֆինանսավորում չկա՝ Ազգային կինոյի մրցանակաբաշխության անցկացման համար։ Ըստ նրա` Օրանժ-Արմենիան սիրով համաձայնեց օժանդակել մրցանակաբաշությանը։ Ժյուրիի նախագահն է Սոս Սարգսյանը, անդամներն են՝ Հենրիկ Հովհաննիսյանը, Կարինե Խոդիկյանը, Հովիկ Հախվերդյանը, Զավեն Բոյաջյանը։ Այս անգամ մրցույթին կմասնակցեն վերջին քսան տարվա ընթացքում նկարահանված ֆիլմերը։
Օրանժի մարքեթինգի տնօրեն Արամ Մկրտչյանն էլ իր հերթին նշեց, որ ժամանակն է ստեղծել մի անաչառ կառույց, որն իր գնահատականը կտա հայ կինոյին, կնպաստի հայ կինոյի զարգացմանը։
«Մեր ռազմավարության մեջ կինոն բացառիկ դեր է խաղում։ Ունենալով միջազգային փորձ` չէինք կարող չօժանդակել այս մրցանակաբաշխությանը»,- ասաց Արամ Մկրտչյանը` հույս հայտնելով, որ դրանով կկարողանան փոխել հայ կինոյի հանդեպ հետաքրքրությունը։
Մրցանակ է լինելու նաև կինոյում ունեցած ներդրման համար` կապված Հայաստանի անկախության 20-ամյակի հետ։ Մրցույթին մասնակցելու համար ֆիլմերը պետք է ներկայացնել Հայաստանի ազգային կինոկենտրոն՝ սույն թվականի հոկտեմբերի 1-ից մինչև դեկտեմբերի 15-ը ներառյալ։ Մրցույթը կանցկացվի երկու փուլով, մրցանակներ կհանձնվեն տասներեք անվանակարգերում։
