Սեպտեմբերի 6-ին, Մայր Աթոռ Սուրբ Էջմիածնում, Ն.Ս.Օ.Տ.Տ. Գարեգին Բ Ծայրագույն Պատրիարք և Ամենայն Հայոց Կաթողիկոսն ընդունեց «Արմենիա» առագաստանավի անձնակազմին` գրող, հրապարակախոս Զորի Բալայանի ղեկավարությամբ:
Նորին Սրբությունը գոհունակություն հայտնեց, որ նավարկությունը բարեհաջող ընթացք է ունեցել: «Տեղյակ ենք այն խանդավառությանը, որ ձեր այցելություններով ստեղծում էիք հայ համայնքներից ներս` հպարտության զգացում փոխանցելով մեր զավակներին ձեր քաջարի այդ արարքով:
Նմանատիպ երևույթները նոր ոգևորություն են ներարկում մեր զավակների հոգիներից ներս և լիցք են հաղորդում նրանց` շարունակելու իրենց ազգապահպան գործունեությունը», – նշեց Վեհափառ Հայրապետը` իր օրհնությունն ու գնահատանքը փոխանցելով ներկաներին:
Նորին Սրբությունը վստահություն հայտնեց, որ հայ ժողովրդի մեջ այս իրադարձությունը կստանա լավագույն գնահատականը և կունենա իր արժևորումը:
Այնուհետև տիար Զորի Բալայանն «Արմենիա» առագաստանավի անձնակազմի անունից շնորհակալություն հայտնեց Վեհափառ Հայրապետին ջերմ ընդունելության համար:
Հանդիպումից հետո Ամենայն Հայոց Կաթողիկոսը Մայր Տաճարում «Պահպանիչ» աղոթքով օրհնեց Իջման Ս. Սեղանի առջև ծնրադրած նավագնացներին` մեկ անգամ ևս մաղթելով նորանոր հաջողություններ իրենց հետագա ծրագրերում:
