ՀՖՖ-ն տեղեկացնում է, որ Հայաստանի ազգային հավաքականը երեկ «Ժիլինա» մարզադաշտում հորդառատ անձրևի ներքո անցկացրել է նախախաղային մարզումը: Մարզումից առաջ տեղի է ունեցել Հայաստանի ընտրանու գլխավոր մարզիչ Վարդան Մինասյանի մամուլի ասուլիսը, որը ներկայացնում ենք Ձեր ուշադրությանը:
– Հնարավո՞ր է, որ Ռոբերտ Արզումանյանը մասնակցի վաղվա խաղին:
– 100 տոկոսով չի մասնակցի վաղվա խաղին: Նա արդեն կպատրաստվի հավաքականի հետագա հանդիպումներին:
– Երևանում Հայաստանի հավաքականը հաղթեց Սլովակիային: Արդյոք նույն խաղը ցուցադրելու դեպքում հնարավո՞ր է հաղթել նաև Ժիլինայում:
– Այստեղ ավելի դժվար կլինի, քանի որ դրսում ավելի բարդ է լինում խաղալ, ուստի պետք է ավելի շատ աշխատել: Հաղթել հնարավոր է:
– Եթե դիտել եք Իռլանդիա-Սլովակիա հանդիպումը, ապա բացահայտե՞լ եք ինչ-որ բան մրցակցի մասին:
– Ինձ չի հաջողվել նայել այդ խաղը: Խնդրել էինք, բայց չտվեցին: Ես դիտել եմ Սլովակիայի հավաքականի նախկին խաղերը և լավ եմ պատկերացնում, թե ինչ է իրենից ներկայացնում Սլովակիան:
– Մովսիսյանից բացի այլ փոփոխություններ կլինե՞ն մեկնարկային կազմում:
– Այո, ևս մեկ փոփոխություն կլինի, բայց այս պահին չեմ ասի:
– Երևանի խաղի համեմատ փոփոխություններ կլինե՞ն Ձեր թիմի խաղում:
– Փոփոխություններ կլինեն, քանի որ խաղը մրցակցի հարկի տակ է: Մարտավարությունը նույնպես այլը կլինի, քան Երևանում, սակայն պետք է նշեմ, որ կան սկզբունքներ, որոնք մենք միշտ պահպանում ենք:
– Հայաստանի հավաքականը հնարավորություն ունի նվաճել Եվրոպայի առաջնության եզրափակիչ մրցաշարի ուղեգիր և այդ առումով վաղվա խաղը շատ կարևոր է: Այդ հանգամանքը կարո՞ղ է հոգեբանական արգելք հանդիսանալ:
– Ոչ, մենք պատրաստվում ենք միայն կոնկրետ խաղերի, այսինքն` տվյալ դեպքում` վաղվա խաղին:
– Ո՞ր ֆուտբոլիստին ենք համարում առավել վտանգավոր մրցակցի կազմում:
– Ինձ ավելի շատ դուր է գալիս Սլովակիան` որպես թիմ: Շատ կազմակերպված և տակտիկապես լավ պատրաստված թիմ է:
– Կարևո՞ր է արդյոք, որ Երևանում հաղթել է Հայաստանը:
– Միգուցե հոգեբանորեն դա որոշակի նշանակություն ունի, սակայն ինձ համար այդ հաղթանակն արդեն անցյալում է:
– Մովսիսյանը վաղը խաղալո՞ւ է: Ի՞նչ կտա դա հավաքականին:
– Նրա վերադարձը շատ լավ է մեզ համար: Բայց պետք է ասեմ, որ Արթուր Սարկիսովն էլ լավ հանդիպում անցկացրեց Անդորրայի հետ:
