«Առաջին լրատվական»-ի զրուցակիցն է Արցախի խորհրդարանի արտաքին հարաբերությունների մշտական հանձնաժողովի նախագահ Վահրամ Բալայանը։
-Պարոն Բալայան, ինչպե՞ս եք գնահատում պաշտոնական Երևանի պահանջով ՄԱԿ ԱԽ-ում Լաչինի միջանցքի հարցով անցկացված նիստի արդյունքները։ Ինչքանո՞վ է այն բավարարում առկա իրավիճակին։
–Իհարկե մենք շնորհակալ ենք, որ տարբեր երկրներ, միջազգային կազմակերպություններ, տվյալ պարագայում՝ նաև ՄԱԿ Անվտանգության խորհուրդն անդրադարձել է ստեղծված իրավիճակին, բայց ակնկալում ենք, որ առավել գործնական քայլեր կատարվեն։ Խոսքն այն մասին է, որ մեր կարծիքով պետք է համապատասխան բնապահպանական խումբ գործուղել ոչ միայն Արցախի Հանրապետություն, այլ ընդհանրապես մեր տարածաշրջան՝ ուսումնասիրելու ու համապատասխան եզրակացություններ անելու համար։ Դրանից արդեն պարզ կլինի՝ արդյոք Ադրբեջանն իսկապես սադրանք է իրականացրել, ինչը մեր կարծիքն է, թե՞ իրական բնապահպանական մտահոգություն ունի։
-Ի՞նչ դիտարկումներ ունեք ՄԱԿ ԱԽ անդամ Ռուսաստանի արձագանքի մասին։ Իռլանդիան, որը որևէ պարտավորություն Հայաստանի ու Արցախի նկատմամբ չունի, շատ ավելի հասցեական ու կտրուկ էր, ինչու՞։
-Դա քաղաքականություն է, որը ճիշտ վերլուծելու անհրաժեշտություն կա։ Դա հեռախոսով չեն անում։
-Իսկ ռուս խաղաղապահների վարքագիծն այս օրերի ընթացքում ինչպե՞ս եք գնահատում, բավարա՞ր ջանքեր են գործադրում։
-Մենք ակնկալում ենք, որ խաղաղապահներն առավել կոշտ վերաբերմունք կցուցաբերեն։ Ոչ միայն Արցախն է հումանիտար աղետի առջև կանգնած, այլ միաժամանակ արհամարհում են Արցախում գոյություն ունեցող ռուսական զորակազմը և թույլ չեն տալիս, որ նրանք իրենց պարտականությունները կատարեն։
-Ի՞նչն է կաշկանդում խաղաղապահներին կատարել իրենց պարտականությունները։
-Համապատասխան լիազորությունների պակասը։ Պետք է նրանց որոշակի լիազորություններ տրվի, որպեսզի որոշակի գործողություններ կարողանան ձեռնարկել, կարողանան անվտանգային միջավայրը ձևավորել։
-Առկա պայմանագրով չունե՞ն այդ լիազորությունները։
-Որքան գիտեմ՝ ո՛չ։
