Եվրոպական հեռարձակողների միությունը, որը «Եվրատեսիլ» մրցույթի կազմակերպիչն է հանդիսանում, Ադրբեջանի իշխանություններին պահանջել է հեշտացնել վիզային ռեժիմը: Միությունը օգոստոսի 31-ին տարածած հայտարարության մեջ նշել է, որ Ադրբեջանը պետք է հստակ երաշխիքներ տա, որ մրցույթին այդ երկիր ժամանող բոլոր հյուրերին կտրամադրվեն մուտքի վիզաներ, կապահովվի այն մարդկանց խոսքի ազատությունը, ովքեր կայցելեն Բաքու, լինեն դրանք երգիչներ, թե լրագրողներ, կամ ուղակի հյուրեր:
Ինչպես նշում է Ազատություն ռադիոկայանը, «Եվրատեսիլ»-ի կազմակերպման հարցերով զբաղվող Խորհրդատվական խմբի ղեկավար Ֆրանկ-Դիտեր Ֆրեյլինգը նշել է, որ սկսած 1956թ-ից նման սկզբունքները մրցույթի համար եղել են հիմնաքարային և 2012 թվականը բացառություն լինել չի կարող:
Մի քանի օր առաջ Բաքու ժամանած «Եվրատեսիլ»-ի գործադիր տնօրեն Յոն Օլա Սանդը նշել է, որ իրենց համար առաջնահերթ է, որ մարդիկ կարողանան գալ Ադրբեջան, մասնակցել մրցույթին և առանց որևէ խոչընդոտի լուսաբանել այն, ինչի կապակցությամբ ինքը խնդրել է Ադրբեջանի կառավարությանը դյուրացնել վիզային ռեժիմը: «Մարդիկ պետք է կարողանան գալ և ազատ աշխատել այստեղ»` նշել է Սանդը:
Մինչև անցած տարի Ադրբեջանի մուտքի վիզա հնարավոր էր ստանալ այդ երկիր ժամանելուց հետո` անմիջապես օդանավակայանում, սակայն արդեն մեկ տարի է, ինչ այդ օրենքը չի գործում և վիզաները տրամադրվում են բացառապես դեսպանատներում:
