Հունվարի 1-ից ջուրը կթանկանա շուրջ 9 դրամով։ Այն դեպքում, որ այս տարի արդեն մեկ անգամ 20 դրամով թանկացել է ջուրը։ Հանրային ծառայությունները կարգավորող հանձնաժողովը, ուսումնասիրելով «Վեոլիա ջուր» ընկերության սակագները բարձրացնելու հայտն, իր հաշվարկներն է ներկայացրել։ ՀԾԿՀ-նանձնաժողովն առաջարկում է 2023 թվականից մեկ խորանարդ մետր ջրի սակագինը սահմանել 208.42 դրամ՝ 200-ի փոխարեն։
Հայաստանի Հանրապետության տարածքային կառավարման և ենթակառուցվածքների նախարարությունը հայտարարել է, որ խմելու ջուրը մինչև 2024թ․ քաղաքացիների համար չի թանկանա: «Հունվարի 1-ից խմելու ջրի մոտ 9 դրամ թանկացման վերաբերյալ լրատվամիջոցներում տեղ գտած հրապարակումների առնչությամբ տեղեկացնում ենք, որ Հանրային ծառայությունները կարգավորող հանձնաժողովն արդեն ավարտել է «Վեոլիա ջրի» հայտի ուսումնասիրությունը և մինչև նոյեմբերի վերջ կայանալիք նիստում պետք է որոշում կկայացնի։ Անկախ ՀԾԿՀ վերջնական որոշումից, Կառավարությունն անհրաժեշտության դեպքում համարժեք սուբսիդավորմամբ կչեզոքացնի գնի ավելացումը սպառողների բոլոր խմբերի համար։ Այսինքն մինչև 2024 թվականը խմելու ջուրը քաղաքացիների համար չի թանկանա»,-ասված է նախարարության հաղորդագրության մեջ:
Այս առնչությամբ, Հասարակական պաշտպանների միության նախագահ Արամ Գրիգորյանը «Առաջին լրատվական»-ի հետ զրույցում նշեց. «Բնականաբար, սա հանրության համար բեռ է լինելու, ցանկացած լումայի թանկացումը նոր բեռ է: Ինձ համար անհասկանալի է կառավարության արձագանքը: Եթե ջրի սակագինը բարձրացնելու են, կառավարությունն էլ սուբսիդավորելու է, բարձրացնելու իմաստը ո՞րն է, ուրիշ ձևերով կարող էին այդ խնդիրը լուծել:
Երկրորդը, ջրի սակագնի գոյացման պրոցեսն է ինձ մշտապես անհանգստացրել: Մի պայմանագիր է կնքված «Վեոլիա ջուր» ընկերության հետ, որտեղ սակագնի բարձրացում է նախատեսված երեք բաղադրիչի հիմքով՝ գնաճ, էլեկտրաէներգիայի գին և օգտագործվող ջրի քանակ: Այսինքն այդ ընկերությունը 6 ամիսը մեկ կարող է ջրի սակագնի բարձրացման հայտ բերել համապատասխան հանձնաժողով և այստեղ խնդիր է առաջանում, թե ինչպե՞ս է գնահատվում օգտագործված ջրի ծավալը: Այս հարցն ինձ համար մշտապես մութ է եղել, որովհետև հանձնաժողովն ինչ-որ անհասկանալի մոնիտորինգ է նախաձեռնում, մի քանի տեղ գնում են, տեսնում են՝ հաշվիչներն աշխատում են, թե ոչ, վերցնում են, ջրային ընկերության թվերն ուսումնասիրում են, և դրանով որոշում են, թե Հայաստանում ինչքան ծավալի ջուր է օգտագործվել, որը սակագնի գոյացման հիմնական բաղադրիչն է»,-ասաց նա:
Արամ Գրիգորյանը նկատեց, որ «Վեոլիա ջուրը» բիզնես քաղաքականություն է վարում. «Ցանկացած ընկերություն իր բիզնես շահերն է հետապնդում: Նման ընկերությունների խնդիրը չէ սպառողների շահերի կամ նրանց գնողունակության մասին մտածելը: Իրենք իրենց բիզնես շահի մասին են մտածում, ինչքան շատ շահույթ ունենան, այնքան լավ: Բայց մենք էլ պետք է հնարավորություն ստեղծենք, որ քաղաքացիները կարողանան իրենց իրավունքները ներկայացնելու և որքան հնարավոր է քիչ վճարել: Դրա համար ստեղծված է հանձնաժողով, որն իր ֆունկցիան չի կատարում:
Տարվա սկզբին արդեն մի անգամ ջրի սակագինը բարձրացավ, իմաստը ո՞րն է մի հատ էլ հիմա փոխել: Այն ժամանակ թող հիմնավորեին, որ ավելի շատ պետք է բարձրանա սակագինը: Ջրի սակագինը դարձել է քաղաքականություն: Որպեսզի սպառողները շատ չբորբոքվեն, ասում են՝ լավ, եկեք էս անգամ քիչ բարձրացնենք, 6 ամիս հետո էլի կբարձրացնենք, որ հիմնավորենք, թե տեսեք, սպառողների մասին մտածում ենք»,-ասաց նա:
Հարցին, թե արդյոք այս թանկացումը հերթական դժգոհության ալիքը չի բարձրացնի՞, ՀԿ ղեկավարը բացասական պատասխան տվեց. «Չեմ կարծում, թե սա դժգոհության ալիք է բարձրացնելու, որովհետև կառավարությունը միանգամից մեղմել է՝ հայտարարելով, թե ոչ մի դրամ չի բարձրանալու, որովհետև ես դա սուբսիդավորելու եմ: Այսինքն այդ դժգոհությունը քնացրել են»:
