«Միջազգային հանրապետական ինստիտուտի» կողմից 2022 թվականի հունիսին անցկացված հարցման մասնակիցների 53 տոկոսը (2021թ.-45%) խիստ դրական ու դրական կարծիք ունի ՀՀ վարչապետ Նիկոլ Փաշինյանի վերաբերյալ: Հարցվածների 34 տոկոսը (2021թ.-28%) խիստ դրական և դրական կարծիք ունի Ալեն Սիմոնյանի վերաբերյալ, 23 տոկոսը՝ (2021թ.-20%) Ռոբերտ Քոչարյանի, 23 տոկոսը՝ (2021թ.-11%) Լևոն Տեր-Պետրոսյանի, 19 տոկոսը՝ (2021թ.-10%) Սերժ Սարգսյանի, 12 տոկոսը՝ (2021թ.-9%) Իշխան Սաղաթելյանի և 12 տոկոսը՝ (2021թ.-7%) Արթուր Վանեցյանի:
Հարցումների համաձայն՝ հարցվողները խիստ բացասական և բացասական կարծիք ունեն հետևյալ գործիչների մասին. Նիկոլ Փաշինյան-33% (2021թ.-33%), Ալեն Սիմոնյան-37% (2021թ.-40%), Ռոբերտ Քոչարյան-61% (2021թ.-57%), Լևոն Տեր-Պետրոսյան-55% (2021թ.-64%), Սերժ Սարգսյան-63% (2021թ.-69%), Իշխան Սաղաթելյան-60% (2021թ.-47%), Արթուր Վանեցյան-64% (2021թ.-67%):
Հարցին, թե ո՞ր քաղաքական գործչին կամ անձին են ամենաշատը վստահում, հարցվողները նշել են՝ Նիկոլ Փաշինյան՝ 16%, Ռոբերտ Քոչարյան՝ 3%, ոչ ոքի՝ 64%, այլ պատասխան՝ 8%:
Այն հարցին, թե ո՞ր քաղաքական կուսակցությանը կամ դաշինքին ձայն կտային, եթե խորհրդարանական ընտրությունները տեղի ունենային հաջորդ կիրակի օրը, հարցվողները նշել են՝ ՔՊԿ՝ 25%, «Հայաստան» դաշինք՝ 6%, ՀՅԴ՝ 2%, ՀՀԿ՝ 1%, չի պատրաստվում քվեարկել հարցվածների 25%, ոչ ոքի՝ 15%:
Այս առնչությամբ սոցիոլոգ Կարեն Սարգսյանը «Առաջին լրատվական»-ի հետ զրույցում նկատեց, որ հարցումն անցկացվել է այս տարվա հունիսին, երբ փողոցային ընդդիմության վազվզոցը նոր էր ավարտվել, և այդ հարցումն ամբողջությամբ քաղաքական մթնոլորտի արձագանքն է նրա, թե ինչ էր տեղի ունենում հունիսին. «Այդ ժամանակ ընդդիմությունը վազվզում էր, Լավրովը մուննաթ էր գալիս և այլն: Չմոռանանք, որ առաջին ամիսներին նույնիսկ նրանք, որոնք անտարբեր էին Փաշինյանի նկատմամբ, հաճելիորեն զարմացած էին Հայաստանի վարքով դիվանագիտական ճակատում, երբ Հայաստանը Ռուսաստանին կողմ չքվեարկեց ուկրաինական ճակատի հետ կապված: Սա հունիս ամսվա կտրվածքն է:
Բոլոր խոշոր կենտրոնները, որոնք սոցիոլոգիական հարցումներ են անում, այդ հարցումները, դրանք կամ պետք է հրապարակվեն հարցումներից առավելագույնը մեկ շաբաթ հետո, կամ այդ հարցերը պետք է չդիտարկվեն, հաշվի չառնվեն: Այդ բոլոր տոկոսները, որոնք ներկայացվել են սեպտեմբերին արդեն զրո իմաստ ունեն:
Քաղաքական հարցումն արեցին, 24 ժամ հետո արդյունքները պետք է լինեն: Եթե 24 ժամում չարեցիր, դա փտած ձկան պես է, հոտ է արձակում և ուտելու չի: Նման հարցումներն իմաստ չունեն: Քաղաքական հարցումը պետք է հրապարակվի շատ արագ, պատվիրատուի սեղանին պետք է դրվի 24 ժամվա ընթացքում, առնվազն 1-2 օր հետո: Այնպես որ այս հարցումը հիմա քննարկելն իմաստ չունի»,-ասաց Կարեն Սարգսյանը:
Նա ընդգծեց, որ այնպիսի կազմակերպություններում, ինչպիսին է «Միջազգային հանրապետական ինստիտուտը», դրվածքը հետևյալն է. «Հարցումն արվում է, հաշվետվությունը գրվում է, տրվում է սրբագրության, գրաֆիկները մեկն է պատրաստում, տեքստերը մեկ ուրիշն է գրում: Ի վերջո, գալիս վերջնկանը հաստատվում է, պատասխանտուները բոլորը պետք է կարդան, համաձայնեն: Ընթացքում օգոստոսն էր, մարդիկ գնացել են արձակուրդ: Բացի այդ, օրենքով պետք է լինի մեկշաբաթյա պաուզա, որովհետև պատվիրատուն կարող է հարցազրուցավարներին չի վստահում, տարվում է ստուգման: Այսինքն մի հատ էլ երկրորդ խումբ է գնում, տեղում ստուգում է: Սա բավական բարդ ընթացակարգ է: Այսինքն քո մոտ պետք է այդ բոլոր ընթացակարգերը գրեթե ավտոմատացված լինեն:
Եթե խոսքը «Միջազգային հանրապետական ինստիտուտի» մասին է, նրանք այստեղ ներկայացուցչություն չունեն, գործընկերներ ունեն, ու այդ դեպքում չգիտենք, թե ով է արել հարցումը:
Ոչ թե հարցմանը պետք է չվստահել, այլ այդ հարցումներում արտացոլված հանրության կարծիքին պետք է չհավատալ: Եթե, օրինակ, խոսքը տնտեսական աճի, արտաքին քաղաքականության մասին է, որոնք ֆունդամենտալ հարցեր են, նորմալ է, որ մի քիչ ուշ հրապարակվեն, բայց քաղաքական վարկանիշները, մանավանդ այս տարիներին, երբ մարդը օրական այնքան տեղեկատվական հոսքեր է ստանում, որը նա 2001-2002-ին ստանում էր 1-2 ամսվա ընթացքում, օրվա մեջ կարող է քաղաքական գնահատականը փոխվել»,-ընդգծեց սոցիոլոգը:
Նա անդրադարձավ նաև ռուս-ուկրաինական պատերազմի վերաբերյալ հարցման արդյունքներին, ըստ որի հարցվողների 17 տոկոսը պատերազմի պատասխանատու է համարել ԱՄՆ-ին, 16 տոկոսը՝ բոլոր կողմերին հավասարապես, 14 տոկոսը՝ Զելենսկիին անձամբ, 10 տոկոսը՝ ՆԱՏՕ-ի անդամ երկրներին, 8 տոկոսը՝ Պուտինին անձամբ, 6 տոկոսը՝ Ուկրաինայի իշխանություններին, 5 տոկոսը՝ ՌԴ-ին, 2 տոկոսը՝ ԵՄ-ին, Կարեն Սարգսյանն ասաց. «Պետք է հասկանալ, թե ով է արել հարցումը, որովհետև ամերիկացիք շատ հաճախ անհասկանալի սկզբունքով են ընտրում, թե ում հետ են համագործակցում: Կարող է, օրինակ, համագործակցեն քոչարյանական գրպանի որևէ կազմակերպության հետ: Ու շատ մեծ հավանականությամբ այն մարդը, ով իրենց համար հարցում է արել, ինքը հարում է ռուսական ճամբարին, կամ անգամ ունի ՌԴ անձնագիր: Արևմուտքը չունի այդ ֆիլտրը, որովհետև մեզ մոտ ընդունված է եղել, որ ռուսական կոնսեռները իրենք իրենց Արևմուտքի կողմնակից են ներկայացրել: Հիմա էլ, որ նայում ենք այդպիսիք կան, որ Արևմուտքից են խոսում, բայց իրենք ФСБ-ի ագենտ են: Հիմա նոր է դա բացահայտվում: Եթե ուշադրություն դարձնեք, երեկ ու այսօր, երբ Ուկրաինան հակահարձակման է անցել, տեսեք ինչ է կատարվում, մարդիկ, որոնք մարտին ասում էին՝ Կիևն առավելագույնը 10 օրից կընկնի, հիմա լրիվ այլ երգ են երգում:
Այնպես, որ ցանկացած հարցում ուսումնասիրելիս, սկզբից նայում ենք, թե ով է արել, հետո նայում ենք՝ երբ է արել: Այսինքն ոչ թե նայում ենք, որ «Միջազգային հանրապետական ինստիտուտն» է հարցումն արել, այլ նայում ենք, թե ով է Հայաստանում նրա գործընկերը, որովհետև նա Հայաստանում չունի ներկայացուցչություն: Գործընկերոջից նոր որոշում ենք՝ հավատալ, թե ոչ»: