Պետությունը պետք է բացահայտված տաղանդը նկատելու և ըստ անհրաժեշտության այն զարգացնելու կոնկրետ մեխանիզմներ ունենա: Այս մասին ասաց Վարչապետը Կառավարության նիստի ժամանակ ունեցած ելույթում:
«Մեկը տաղանդավոր է բնական գիտությունների, մյուսը՝ արվեստի, երրորդը՝ արհեստի, չորրորդը՝ սպորտի մեջ: Մենք պետք է կարողանանք մեխանիզմներ տաղանդի զարգացման ընդհանրական ծրագրերից, ինչի մասին վերը նշեցի, հնարավորինս վաղ անցում կատարել անհատական ծրագրերի, նկատի ունեմ հնարավորինս վաղ նկատել կոնկրետ երեխայի տաղանդը, գնահատել տաղանդի առավելագույն զարգացման համար անհրաժեշտ կարիքները և դրանք զարգացման անհատականացված ծրագրերով ապահովելու պետական երաշխիքներ ստեղծել»,- ասաց Փաշինյանը:
Վարչապետը նշեց, որ այս թեմային անդրադարձել է կրթության զարգացման պետական ծրագրի քննարկումների ժամանակ:
«Ես հիմա սա բարձրաձայնում եմ այս գաղափարի հետագա զարգացման անհրաժեշտությունն արձանագրելու համար և վարչապետի աշխատակազմը, կրթության, գիտության, մշակույթի և սպորտի նախարարությունը սա պետք է ընկալեն որպես հանձնարարական:
Ընդ որում, տաղանդի զարգացման համակարգը պետք է գործի մանկապարտեզից մինչև ուսումնարան ու բուհ: Մեր տեսլականն է, որ երկրում որևէ երեխա չպետք է զրկվի իր տաղանդը առավելագույնս զարգացնելու հնարավորությունից՝ իր ընտանիքի սոցիալական վիճակի պատճառով: Ընդհակառակը՝ պետությունը պետք է երաշխավորը լինի այն մոտեցման, որ յուրաքանչյուր երեխայի տաղանդ պետական արժեք է և պետք է պաշտպանվի պետության կողմից»,- ասաց Վարչապետը: