ՄԱԿ-ի Գյուղատնտեսության և սննդամթերքի համաշխարհային կազմակերպությունը (FAO) զգուշացրել է թռչնագրիպի հնարավոր ակտիվացման մասին՝ հայտարարելով, որ վայրի թռչունների միգրացիան վիրուսը հասցրել է այն երկրներ, ուր այն երբևէ չի եղել, և որ մուտացիայի ենթարկված այդ վարակը տարածվում է Ասիայում:
H5N1 մուտացիայի ենթարկված շտամը, որն ամենայն հավանականությամբ անհնար է վերացնել գոյություն ունեցող դեղամիջոցներով, տարածվում է Չինաստանում և Վիետնամում: Կազմակերպությունը կոչ է արել հետևել վիրուսի ընթացքին, որպեսզի հնարավոր լինի կանխարգելել նրա տարածումը:
Անցյալ շաբաթ Առողջապահության համաշխարհային կազմակերպությունը հայտնել է, որ քամբոջացի 6-ամյա մի աղջնակ մահացել է թռչնագրիպից, իսկ տարեսկզբից հաշված՝ այդ վարակից երկրում արդեն մահացել է 8 մարդ: ՄԱԿ-ի Գյուղատնտեսության և սննդամթերքի համաշխարհային կազմակերպության տվյալներով, թռչունների միգրացիան H5N1 վարակը բերել է այն երկրներ, որտեղ երկար տարիներ չի եղել, այդ թվում՝ նաև Իսրայել, Պաղեստին, Բուլղարիա, Ռումինիա, Նեպալ և Մոնղոլիա:
«Վայրի թռչունները կարող են բերել վարակը, սակայն այն տարածվում է մարդկանց կողմից թռչնաբուծության ոլորտում իրականացվող աշխատանքների հետևանքով»,- ասել է կազմակերպության ներկայացուցիչը: Թռչնագրիպը առաջին անգամ հայտնվել է Եգիպտոսում՝ 2006 թ-ին: Ընդհանուր առմամբ՝ H5N1 վիրուսը հայտնաբերվել է 78 մարդու մոտ: Վարակվածներից 27-ն արդեն մահացել են:
