ՀՀ նախագահ Սերժ Սարգսյանը այսօր Ծաղկաձորում հանդիպելով «պահանջում ենք գիտության ֆինանսավորման ավելացում» նախաձեռնության կազմակերպած սեմինարի մասնակիցներին, նշեց, թե ինքը չգիտի, թե Հայաստանում քանի մարդ է գիտությամբ զբաղվում: «Եվ ես չգիտեմ այդքանից քանի տոկոսն է մրցունակ, որ տոկոսն արժե, որ զբաղվի դրանով, և որևէ պաշտոնյա չի կարող նստել և որոշել, թե որն է մեր երկրի համար այն քանակը, որ կլինի օպտիմալ»- ասաց Ս. Սարգսյանը: Ֆիզիկամաթեմատիկական գիտությունների դոկտոր, Հայկական աստղագիտական ընկերակցության նախագահ Արեգ Միքայելյանի այն դիտարկմանը, թե մեր ազգի ամենամեծ արժեքը մշակույթն ու գիտությունն են, և որ որքան շատ լինեն գիտնականները, այնքան լավ, Սերժ Սարգսյանը պատասխանեց. «Ես այդպես չեմ համարում, որ ինչքան շատ լինեն, այնքան լավ»:
«Ընդհանրապես ամեն ինչի ծայրահեղությունը շատ վատ բան է: Ինչ է նշանակում ինչքան շատ լինեն: Բա որ բոլորը գիտնական լինեն: Այսպիսի մի բան կա. յուրանքաչյուրին իր պրոբլեմը թվում է ամենամեծը: Շատ ներողություն, որ կենցաղային մակարդակի եմ բերում, եթե մարդու ատամը ցավում է, ասում է` աշխարհի ամենածանր ցավը ատամի ցավն է, հենց որ ականջն է ցավում` ասում է` ականջի ցավն է: Բա եթե մենակ էդ խնդիրը լիներ, էլ ինչ կա: Մենք 1000-1500 տարի առաջ կառուցած մշակութային կոթողներ ունենք, որոնք այսօր շատ մեծ ֆինասավորման կարիք ունեն: Հիմա ո՞րն է լավ, դնեք ասենք մեզ համար դա ինքնանպատակ է, դնենք գիտականների քանակը հասցնենք միջին եվրոպական մարկարդակին, թե՞ դնենք այն եկեղեցին պահպանենք: Հաջորդ բանը կա` այդ եկեղեցին պաշտպանող բանակ կա, հիմա ինչ անենք, բանակին էլ չֆինասավորենք, ուզո՞ւմ եք այդ բանակին էլ այդտեղից հանենք, գան էն եկեղեցին էլ տանեն, ամբողջը բերենք գիտությանը տանք, բա այն ծնվող երեխաները, մեր ծննդատները չվերանորոգե՞նք, նորմալ պայմաններ չստեղծենք, հազարավոր հարցեր կան, բայց որտեղից»- ասաց Սերժ Սարգսյանը: «Գիտության համար միշտ կգտնվի, մենք Ձեզ կհամոզենք»,- ֆիզիկամաթեմատիկական գիտությունների դոկտոր Արթուր Իշխանյանը: «Այսօր ինչքան էլ խոսենք, անպտուղ խոսակցություն է լինելու»,- նշեց Ս. Սարգսյանը:
