Ադրբեջանում արաբական հեղափոխությունների սցենարի կրկնության հավանականության վերաբերյալ իր դիտարկումներն այսօր լրագրողներին հայտնեց քաղաքագետ Նարեկ Գալստյանը:
Գալստյանը նկատեց, որ արաբական հեղափոխությունների հենց սկզբից խոսվում էր այն մասին, որ շատ հնարավոր է այդ սցենարները կրկնվեն նաև Ադրբեջանում: Ըստ քաղաքագետի՝ Ադրբեջանում երեք հեղափոխական պոտենցիալ գոյություն ունի` քաղաքացիական պոտենցիալը, կրոնական` իսլամական հեղափոխության հնարավորությունը և ազգային փոքրամասնությունները. «Այս երեք պոտենցիալները տարբեր կոմբինացիաներով կարող են աշխատել, եթե իհարկե, իրական սցենար լինի, սակայն կարծում եմ, որ պետական համակարգը Ադրբեջանում բավականաչափ ամուր է և կարողանում է հեշտությամբ կանխել քիչ թե շատ հեղափոխական պոտենցիալ ունեցող ուժերի զարգացումը, և քիչ է հավանականությունը, որ արաբական սցենարները կկրկնվեն Ադրբեջանում»:
Նարեկ Գալստյանը նաև նկատեց, որ այսօր Ադրբեջանը Արևմուտքի համար վերածվում է էներգետիկ հանգույցի, որի կառավարելի լինելը Արևմուտքի կարևոր խնդիրներից մեկն է, և այդ տեսանկյունից, ըստ քաղաքագետի, պետք է հաշվի առնել, թե որքանով է Ալիևի կլանը ընդունելի Արևմուտքի համար, իսկ վերջինս ներկայումս ռեալ շահագրգռվածություն չունի Ադրբեջանում հեղափոխություններ իրականացնելու համար: Ըստ Գալստյանի՝ նման շահագրգռվածություն այսօր ունի Իրանը:
Ինչ վերաբերում է այն հանգամանքին, թե ինչքանով է արաբական սցենարների կրկնությունը Ադրբեջանում ձեռնտու Հայաստանին, Գալստյանը նշեց, որ միշտ չէ, որ հեղափոխությունները իշխանության են բերում մարդկանց, որոնք հարևան երկրների համար ձեռնտու են լինում. «Այստեղ խնդիրն այն է, որ բոլորովին հայտնի չէ, թե հեղափոխության դեպքում ինչպիսի ուժեր կգան Ադրբեջանում իշխանության և ինչ քաղաքականություն կիրականացնեն մեզ համար առավել հրատապ Արցախյան հակամարտության կարգավորման հարցում»:
